Әңгімелер ✍️

Қанжығалы Саққұлаққа Мұса би сәлем бере келе жатып бір қатар кісімен ақылдасыпты:

— Сәкеңе не деп сәлем береміз? — деп.

Сонда Жандәулет деген ақсақал биі:

— Саққұлақ не десе, о десін, сен Мұса қолын ұстағанда «Орта жүздің арыстаны» деңіз! — депті.

Айтқандай Мұса келіп:

— Ассалаумағалайкум, Орта жүздің арыстаны — дейді.     

Саққұлақ би:

— Уағалайкум ассалам, Орта жүздің шам-шырағы — депті.

Сонда халық: — Мұса ойланып тапты, Саққұлақ ойланбай айтты, Саққұлақ дана — депті.