Дастарханға мағыналы және жаттауға арналған 25 бата

1. Берекелі дастархан жайылған үйдің мерейі үстем болсын. Ас ішкен жанның көңілі тоқ, ниеті ақ болсын. Қазаннан дәм, шаңырақтан сән кетпесін. Балаларың ата жолын ардақтап, ана сөзін қадірлейтін ұрпақ болып өссін. Дастархандарыңнан ырыс арылмасын. Әумин.

2. Ақ дастарханның басына жиналған ағайынның арасы ажырамасын. Бірлік бар жерде тірлік бар, сол тірліктің тұрағы мығым болсын. Төрдегі қарияның батасы қабыл, үйдегі жастың талабы оң болсын. Ризығың тасып, несібең арта берсін. Әумин.

3. Жайылған дәмнің қадірін берген Алла берекесін де бірге берсін. Әр үзім нан адал еңбекпен келіп, адал ниетпен желінсін. Үй иесінің абыройы асқақтап, келген қонақ ризашылықпен тарқасын. Ырыс пен ынтымақ қатар қонсын. Әумин.

4. Дастарханның үсті дәмге, жүректерің мейірімге толы болсын. Босағадан бақ аттап кіріп, өкпе-наз сыртта қалсын. Ұрпақтарың елге сыйлы, жұртқа қадірлі азамат болып жетілсін. Құттарың ортаймасын. Әумин.

5. Қазанның оты маздап, шаңырақтың түтіні түзу шықсын. Малдарың өрісте өсіп, еңбектерің жемісін берсін. Әр күнің берекемен басталып, шүкіршілікпен аяқталсын. Адал ризықтарың көбейе берсін. Әумин.

6. Асқа жиналған жұрттың көңілі кең, пейілі дарқан болсын. Бүгінгі дәм ертеңгі жақсылықтың бастауы болсын. Ағайынның ынтымағы жарасып, туғанның қадірі арта түссін. Ел аман, жұрт тыныш болсын. Әумин.

7. Ақ дастарханның айналасында айтылған жақсы сөздер жүрекке шипа болсын. Үлкеннің өнегесі, кішінің ізеті жоғалмасын. Қуаныштарың көбейіп, қайғыларың алыстасын. Береке-бірліктерің баянды болсын. Әумин.

8. Нанның қадірін білген елдің бағы артады. Сол бақ сендердің де үйлеріңе тұрақтасын. Ынтымақтарың темірқазықтай берік болып, ниеттерің ақ жолға бастасын. Құт-береке серіктерің болсын. Әумин.

9. Дастарханға қойылған әр дәмнің артында еңбек жатыр. Сол еңбектің сауабы мол болсын. Маңдай термен келген несібелерің ортаймай, ұрпақтарыңа игілік болып жұғыссын. Шаңырақтарың шаттыққа толсын. Әумин.

10. Төрлерің қонақтан босамасын, дастархандарыңнан дәм үзілмесін. Келген жан разы болып, кеткен жан жақсы сөз айтып жүрсін. Үйлеріңнен күлкі кетпей, қуаныш көбейсін. Әумин.

11. Берекенің басы – бірлік. Сол бірлікті Алла сендердің отбасыларыңа мәңгі серік етсін. Ағайын арасы алшақтамай, татулық туы жығылмасын. Несібелерің тасып, мерейлерің өссін. Әумин.

12. Ас ішкен жерде ақ тілек айтылады. Бүгінгі ақ тілек ертеңгі ақиқатқа айналсын. Балаларың білімді, немерелерің өнегелі болсын. Үйдің іші шаттыққа кенелсін. Әумин.

13. Кең даладай көңіл берсін, мөлдір бұлақтай ниет берсін. Дастархан басындағы сыйластық ұрпаққа үлгі болсын. Төрдегі қарияның ғұмыры ұзақ, жастардың жолы ашық болсын. Әумин.

14. Құт қонған шаңырақтың керегесі кең болады. Сол құт осы үйден кетпесін. Әр күніңіз игілікке толып, әр ісіңіз оңынан келсін. Дәм-тұздарыңыз жарасып, ризықтарыңыз арта берсін. Әумин.

15. Жақсы ниет – жарым ырыс. Бүгінгі жиналған жұрттың ниеті қабыл болып, әр шаңыраққа жақсылық болып оралсын. Адал еңбек абырой әкеліп, ел алдында беделдерің артсын. Әумин.

16. Дастарханның үстіндегі дәм қандай мол болса, жүректеріңдегі мейірім де сондай мол болсын. Бір-бірлеріңе сүйеніш, қиындықта тірек болыңдар. Босағаларың берік, шаңырақтарың биік болсын. Әумин.

17. Қазақтың дастарханы ешқашан тар болмаған. Сол дарқандық сендердің де әулеттеріңде жалғаса берсін. Қонақ келсе қуанып қарсы алып, шығарып салғанда алғыс алатын ел болыңдар. Әумин.

18. Адал астың дәмі тәтті болады. Сол тәттілік өмірлеріңе де жұғыссын. Еңбектерің еленіп, тілектерің орындалып, қуаныштарың көбейе берсін. Әумин.

19. Туған-туыс бір дастарханға жиналса, ол да бір ырыстың белгісі. Осы берекелі басқосулар жиілеп, ағайын арасы бұрынғыдан да беки түссін. Құтты қонақ көп келсін. Әумин.

20. Көктемгі жаңбыр жерді көгертеді, жақсы сөз көңілді көгертеді. Осы дастархан басындағы ізгі тілектер өмірлеріңді нұрландырып, үйлеріңе шаттық әкелсін. Әумин.

21. Ақ дастархан жайылған үйдің абыройы биік болады. Сол абыройларың артып, қадір-қасиеттерің көбейсін. Балаларыңның қызығын көріп, немере сүйіп отыра беріңдер. Әумин.

22. Дәмнің қадірін білген адам өмірдің де қадірін біледі. Ризықтарыңды қадірлеп, шүкіршілікпен өмір сүріңдер. Береке сендерді айналып өтпесін. Әумин.

23. Төрдегі үлкен аман болсын, төрге ұмтылған жас талапты болсын. Әр буын өз міндетін адал атқарып, әулеттің абыройын асырсын. Ырыс-құттарың мол болсын. Әумин.

24. Бір үзім нанның өзінде мың адамның еңбегі бар. Сол еңбекті бағалайтын ұрпақ тәрбиелеуді нәсіп етсін. Дастархандарыңнан адал ас, үйлеріңнен жақсы сөз үзілмесін. Әумин.

25. Жиналған жұрттың жүзі жарқын, көңілі шат болсын. Осы дастархан талай қуаныштың куәсі болып, жақсы жаңалықтармен толыға берсін. Бақтарың баянды, мерейлерің үстем болсын. Әумин.

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇