Cәбит Мұқанов (Сүт зауыты)

Мәз-мәйрам боп, қарқ-қарк, күліп қатындар,
Шуласады: «Жылдамырақ тартыңдар!»
Күр-күр етіп зырылдайды доңғалақ,
Күлімдейді өңкей «нашар-пақырлар».
Талай шелек лық толып тұр мөлтілдеп,
Желге ұшады көбіктері желпілдеп,
Сепаратор шелегіне құйған сүт
Шұп-шұқыр боп ағып жатыр бүлкілдеп.
Сар-сар етіп сүт бір жақтан ағады,
Бір тесіктен жылжып қаймақ тамады.
Қуанысып жас балалар маңайда,
Қызық көріп сүт көбігін жалады.
Кешке таман келсе Шоқпыт даладан,
Шайды жасап қойған екен манадан,
Буы шығып, жып-жылы боп, май сасып,
Ыдыста тұр турап қойған таба нан.
Екі езуден аппақ майды ағызып,
Дастарқанға тамшылатып тамызып,
Қарын тойып Шоқпыт жатыр шынтақтап,
Жүрегінің қыжылдағы жазылып.
- Қатын!- деді Шоқпыт түртіп Ақықты,-
Алдаберген майды неден сатыпты?
- Екі пұтты отыз сомға беріпті,
Өзі дағы пайдаға әбден батыпты.
Қарқ-қарқ күліп, Шоқпыт тартып мұрнын,
Шөппен сүртіп етігінің жұлығын:
«Машинадан көрген пайда аз емес,
Биылғы жыл жаман емес ырымым...»
Сүт зауыты кедейлерге пайдалы,
Бір сиырдың алты ай жазғы қаймағы
Кедейлердің жетпегенін түгелдеп,
Сататұғын семіз қылып бойдағы.
Сүт зауыты - шаруаның бұлдысы,
Кысы-жазы басын жоймас құндысы,
Талай зауыт әлі-дағы орнамак,,
Бұл сүт зауыт ауылдағы жыл құсы.