Өлеңдер ✍️

Көрсетеді қазақ жомарт, елдігін,
Көсілген бай даласындай кеңдігін.
Шақырған соң сыйлығыңды дайындап,
Сенбілік кеш тойға келдің сен бүгін.
Қимас досың жаның қалай жай табар,
Ол туралы сенсің жалғыз айта алар.
Бірақ осы тойда біраз пенденің,
Сырты да емес, ішкі сыры байқалар.
Бұзбайық деп мұсылмандар бірлікті,
Көп алдына шықты міне бір мықты.
Әзіл ғой деп бір күліп ап, сонан соң,
Жайып салды айтылмайтын шындықты.
Жасырмаймыз кеште айтылды көп тілек,
Бұдан да асқан болды бірі ептірек.
Пәтер сыйлап, мінгізер ем машина,
Қол қысқа деп сөз қырманын төкті кеп.
Болмас сірә жақсылықтан үркуге,
Сауық кешсіз күн кешуің мүмкін бе?
Той иесін таң атқанша мадақтап,
Алтын адам жасап кетті бір түнде!