Өлеңдер ✍️

Қапырық!..
Неткен қапырық...
Қарадан-қарап қапылып,
Өлетін болдық тұншығып,
Көметін болды аһ ұрып.
Ауаны тазартыңдаршы!
Опасыз сөзді отыра бермей сапырып...
Қапырық...
Неткен қапырық...
Ойлыны меңдеп ой-қауіп,
Ойсыздың көңілі тойға ауып,
Тұт жеген бұлбұл секілді,
Тұсалды тілім сайрауық...
Тіліңді бірақ не қылсын
Жүргендер кілең май қауып?
Қапырық...
Неткен қапырық...
Шытырман ойға шатылып,
Тал түсте тегіс тұншығып,
Болдық па сонша мақұлық?..
Шырмаудың бәрін жапырып,
Шықсақ қой тысқа атылып!
Арыңнан жұрнақ қалды ма,
Біткенде бәрі сатылып?
Ауаны тазартпаймыз ба,
Аруағымызды шақырып!?.
Қапырық... Қапырық... Қапырық...