Өлеңдер ✍️

Құдықтарға жуық болғым келмейді,
Түбі жоқ.
Қоңыр күздей суық болғым келмейді,
Мұңы бар да, тілі жоқ.
Ерте келіп ерте кеткім келмейді,
Қию қайда өмірді?!
Жылы сөзбен еркелеткім келмейді
Көңілді.
Айды естімес қатты болғым келмейді,
Түнімен.
Ел жаяуда атты болғым келмейді,
Шынымен.
Жүрегімді аша салғым келмейді
Жанға кез келген.
Бес күнімді шаша салғым келмейді
Бос сөздермен.
Үйіме де жақын болғым келмейді,
Бар туысым – жел, елес...
Және мүлдем ақын болғым келмейді,
Жазатын да мен емес.