Өлеңдер ✍️

Сондағы, шіркін, көктемдер,
Көтеріп кеткен еңсені.
Ақ жауын жауып өткенде,
Есіме алдым мен сені.
Атыңды қосып жыр жаздым,
Өзіңсіз қалай жай табам.
Шұғыласын көріп нұр-жаздың,
Аңсадым сені қайтадан.
Күз таңын келіп атырды,
Киініп өңшең сарыға.
Гүлдерді көріп ақырғы,
Сағындым сені тағы да.
Жер бетін мамық жапқын-ды,
Ақ қайың алқа тағынып.
Көрдім де әппақ ақ қарды,
Еске алдым сені сағынып.
Гүл егіп кеткен жаныма,
Өкпем жоқ менің еш саған.
Жыр жазар сайын тағы да,
Мен сені жиі еске алам.