Баталар ✍️

- Жай қолыңды, Тілеуғұл,
Жаңа қоныс құт болсын!
Малың тусын егізден,
Балаларың жұп болсын!
Ал ырысың алпыс нар
Көтере алмас жүк болсын!
Болжап көрсем жұртымнан
Жаманшылық тыс болар.
Бақ ұялап, жыр тұнған
Мекен болар Үш Қамау.
Жақсы күнді атырып,
Тиіп елге шуағы,
Осы өлкеден ақиық
Азаматым шығады...
Той басталсын қауымда,
Жіберіңдер ат басын.
Дұшпан енді ауылды
Қамағаннан сақтасын.
Кездер өтті талайсыз,
Көтерілді еңсе бір.
Үш Қамауда алаңсыз
Өсіп
-өнгін, Байшегір.
Шалғай шетке көп соға
Қоймас тағдыр дауылы.
Санар сені жақсы аға
Арықтыным бауырың.
Бейбіт шақ ед, бар шыным,
Өмір бойғы арманым.
Сол күн туды, Қайшылы,
Күшік пенен Балғалым.
Бөлінбесін ой санға,
Естілмесін азалы үн.
Сендер аман болсаңдар
Жаман болмас қазағым.
Ұмытылмас ізгілік
Елің барда бір қауым.
Жылдар өте бізді де
Еске алады ұрпағым.
Қабыл еткін, Жаратқан,
Бата бердім қауымға:
Ұрпағымды сауаптан,
Шапағаттан айырма,
Ынтымақтан айырма!