Өлеңдер ✍️

Көне қала ұй
ықтап жатыр Сауранда,
Қорықпайды анталаған жаудан да,
Торықпайды қауесет пен даудан да.
Қатыспайды теріміне мақтаның,
Жалған ақпар жолдамайды ауданға,
Көне қала ұйықтап жатыр Сауранда.
Ұйықтап жатыр ұйқысымен алыптың,
Жұмысы жоқ дақпыртында даңқтың.
Таласпайды товарларға дефицит
Шағымы да жоқ мұндағы халықтың.
Ереуілдеп көшелерге шықпайды,
Естілмейді даңғазасы сауықтың.
Шаңға айналып
шуылдаған шаһардан
Ұйқтап жатыр шығып енді қатардан.
Шыңғыс ханның көмейіне кептелген
Шығыстағы қамал еді қаһарман.
Қамал еді...
Жатыр енді қансырап,
Ошақтарда көмілгендей сан сұрақ.
Қара сирақ балалары Сауранның
Қайтер едік қынқылдаса нан сұрап...
Сұрамайды,
Сездірмейді сынғанын,
Ешкімге де естіртпейді мұңлы әнін.
Етпетінен түсіп жатқан секілді,
Бауырына басып алып жұмбағын...