Өлеңдер ✍️

Бабалардың даламды

Қимай-қимай өткені-ай.

Далама біткен жанарды

Сыйлай-сыйлай өткені-ай.

Ағалардың даламды

Шимай-шимай еткені-ай!

Аямайтын заман кеп,

Төрін жырып жатқаны-ай.

Кенін тауып алам деп,

Өрін сырып жатқаны-ай.

Шөбін шауып алам деп,

Көнін қырып жатқаны-ай!

Атамекен – үй біреу,

Көрген қорлығы әлі аз ба?!

Кең даламды кейбіреу

Салмақ талан-таражға.

Тыртық-тыртық онсыз да,

Ұқсайды аяқ-қолсызға!

Жыртып-жыртып алатын

Қол сүртетін қағаз ба?!

Шабуылға шықтық-ау

Жерімізге жендеттей.

Батырмыз деп ұқтық-ау,

Қайтеміз біз кер кетпей?!

Зираттарды жырттық-ау,

Қалғандай-ақ жер жетпей!

Болмас па еді таптамай

Ата-баба сүйегін?!

Аруағың атпағай,

Қара жер, бас иемін!

Құдай өзі сақтағай,

Қайда, ағайын, киелің?!

Қайда, ағайын, киелің?!