Өлеңдер ✍️

О, ғажап,
Жырға гүлін тағып қырдың,
Балқып бір қызуында шабыт-нұрдың, –
Жүргенде
Енді қашан жолығар деп,
Аңсатқан қыз бейнелі Бақыт шіркін, –
Жайғандай бір шұғыла алдан құшақ,
Аймаңдай арайы мол арманға ұсап,
Сен маған кездестің-ау,
Тек мен үшін
Етердей бүкіл мынау жалғанды шат!
Сонда күй
Кеудемдегі шанақтан сан
Самғады,
Сияқты бір қанаттанған.
Дəл сол кез кетердей ед өртеп мені,
Жанарың – жалт етіп бір қарап қалған!
Мұңлы жанның жазатын мол жарасын,
Жүректен, өлсем қалар, сол қарасың!
...Жүректен, өлсем қалар, сол қарасың.