Өлеңдер ✍️

Сыр тыңдаған ақ қайыңнан

Балалық шақ өтті қырда.

Алған тәлім жастайымнан:

«Сындырма тал»,

«Көкті жұлма!»

Жоқ ол кезде мақта, мамық,

Жатып өстік тар тулақта.

Жүр жадымда қайталанып:

«Киелі құс, аққуды атпа!»

Үйге келген жыланды да

Ақ құйып ел шығаратын.

Жыр ететін құланды да

Атқан жанды сыбап ақын.

Құлағымда әкем үні:

«Құс ұясын бұзба!» деген.

Қаным сүймес  қатерліні,

Мылтық көрсем мұздар денем.

Сескенемін алдаспаннан,

Суық,

Сұсты маған бәрі...

«Қызыл кітапты» алғаш жазған

Біздің ауыл адамдары!