Ілияс Жансүгіров (Таныңдар)

 Ілияс Жансүгіров (Таныңдар)

Қара, бүгін далаға,
Қара бүгін жер қандай?
Кешегі күн тулақ па?
Жерлеріңді таныңдар.
Қара, бүгін далаға,
Қара, бүгін ел қандай?
Кешегі бай кулак па?
Ерлеріңді таныңдар.
Қара бүгін далаға,
Қара, бүгін ер қандай?
Кешегі құл тымақ па?
Ерлеріңді таныңдар.

ЖАҢА ЖАҚ

Аударылып асты - үсті,
Астан - кестен болған жақ.
Шен, знакты қожасыз,
Кеңесті кең құрған жақ.
Еңбекшісі топтасып,
Енбексізін қуған жақ.
Капиталдық, бектіктің,
Тамырына балтаны
Ұңғылата ұрған жақ!

СОЛТҮСТІК- ШЫҒЫСЫҢ

Қазақстан жерінің,
Солтүстігі - шығысы.
Қарағанды, Қарсақпай,
Екібас, Спасс, Қоңырат,
Көмір - металл комбинат
Кен - қазына жынысы.
Ақжар, Риддер, Алқабек
Алтай - алтын, қорғасын,
Цинкі, қола, күмісі.
Соның бәрін қаусыра,
Отарбаның жүрісі
Сол байлықтың үстіне:
Арқа малдың қонысы,
Ертіс егін ырысы.

ОҢТҮСТІГІҢ

Қазақстан жерінің,
Оңтүстігі құбыласы.
Қорғасын, мыс, таусағыз,
Қаратаудың жалғасы.
Арасар, дәрі, асыл тас,
Алатаудың жырасы.
Мақта, кендір, майқурай,
Өнерлі егіз ұясы.
Сол байлықтың үстіне:
Сыр, Жетісу мал баққан,
Қалың егін шудасы.

БАТЫСЫҢ

Қазақстан батысы
Былқылдаған май балық.
Арал, Каспий жатысы,
Қайнап біткен бөрге тас,
Химияның қатысы!
Май мұнайдың фонтаны
Көкке шапшып атысы!
Қандырмап па дүниені
Ембі қауға тартысы.
Сол байлықтың үстіне
Малдың жайы Ақжайық.
Жайықта егін орасан,
Міне, жоспар айтысы.

ҰЙЫСҚАН ЕҢБЕК

Кеше мұндай жер ме еді?
Бүгін еңбек майданы.
Кеше мұндай ел ме еді?
Бүгін колхоз айнала.
Қол қойғаны - еңбегі,
Социалдық тұрмысты
Соғуға күші кернеді.
Таптасты да тұтасты
Шапты жауын жерледі,
Жаңадан жаңа тудырып,
Жоспардан жоспарға өрледі.
Социалдық еңбекпен,
Терледі колхоз, терледі...

МАЛ, ЕГІН, ЗАВОДТАРЫ

Даладағы дәулетің
Жүз жүздеген совхоздар.
Қайнады қыр, мыңғырды,
Біреуі егін, бірі мал.
Қор құйылды далаға,
Миллион- миллион сомалар,
Жазды құлаш жаңа өмір
Социалдық шаруалар.
Бүгінгі күн бұлардың.
Осындағы ерлердің
Ел мен жұрты қолын ал!

ЖОЛШЫЛАР

Ерлер салып бітірдің
Түрксіб, қазақ жолдарын.
Тағы - тағы салмақсың,
Бұл жолдардың оңдарын.
Жаңа завод - фабрик
Тамыры еңбек орданың.
Сол жолдарға тиелер
Жерден алған тондарың.
Дүрілдет. Қайнат! Жұмысты,
Жұмысыңмен мықталсын!
Социалдық қорғаның!

КӨМІРШІЛЕР

Қазақстан дәулеті
Қарағанды дүкені.
Қарағанды одақтың
Дүкенінің үлкені.
Сондағы еңбек ерлері
Бүгінгі күн қарқындат!
Бүйіріне шахтаның
Батыра сал керкіні!
Бұрқыратсын көмірді
Білегінің серпіні!

МАЙШЫЛАР

Ембідегі ерлер - ау,
Құтты болсын мерекең
Ел алдына кел бері - ау,
Жоспарыңды орында,
Көтеріл де, сермел - ау.
Қопарылсын мұнайлар,
Ақтарылсын кендер - ау.
Социалдық еңбектің
Қаһарманы сендер - ау...

КЕНШІЛЕР

Ақтөбедегі ерлер - ау,
Сал ұранды, қайдасың!
Заводыңды тез жүргіз!
Дөңгелегің айналсын.
Химияңның қазаны
Шымыр - шымыр қайнасын.
Сол қайнаған қазандар,
Социалдық өмірдің
Дөңгелегін майласын!

КОЛХОЗШЫЛАР

Колхоз, қаһармандары!
Сал қаланды жинала.
Жинал бүгін далаға,
Шық қолыңа ту ала.
Бай - жуанды жанышта,
Құйыршықты қуала.
Берекелі мал жина,
Пішеніңді маяла.
Егін айда, ал жина!
Миллион - миллион қолдарсың!
Қолдарыңмен сендердің
Көгерді ғой қу дала!

ЕКПІҢДІЛЕР

Сәлем! Еңбек ерлері!
Еңбекшілер, күшті ерлер.
Социалдық жарысқа
Әу десіп кеп түскендер!
Еңбегімен бәйге алған,
Ел танысын күшті ерлер!
Дүрілдет! Қайнат! Қимылда!
Екпінділер! Іскерлер!

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇



Пайдалы сілтемелер:
» Ораза кестесі 2024 жыл. Астана, Алматы, Шымкент т.б. ауыз бекіту және ауызашар уақыты
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу

Соңғы жаңалықтар:
» 2024 жылы студенттердің стипендиясы қанша теңгеге өседі
» қазақ тілі тестілеуде_келген_сұрақтар_зерттеуші
» Наурыз мейрамы Қазақстанда жаңа форматта тойланады