Өлеңдер ✍️

Сергіп бір жүрген шағымда
Серілік мені буады,
Сырлас дос іздеп жаныма,
Жүректен жырлар туады.
Сүйетін жігіт едім мен
Айқара көңіл ашқанды,
Сұп-суық сұрғылт өмірден
Қалайды жаным қашқанды.
Көктемдей болып құлпырып,
Желпініп жүрсек керім-ді,
Жүрегің -бұлақ жұлқынып,
Сырлас дос іздер сері үнді.
Па, шіркін, пәни-тірлікте
Жарасым тауып жан-әлем,
Дос келер деген үмітте
Күндерің өтсе дәмемен.
Оларды күтіп жалықсам,
Мен өзім маза таппаймын.
Ойларға шомып жабықсам,
Тып-тыныш үйде жатпаймын.
Кетемін кезіп даланы,
Кетемін шарлап қаланы,
Достар да мәз боп қалады,
Көңілдің есіп самалы...