Өлеңдер ✍️

Күлімдеп сен келсең ғой, пай, қашанда,
Асау көңлім ұқсамас жайбасарға,
Жалынымды үрлесең жалыныңмен,
Кім біліпті, арманмен Айға асам ба?
Күлімдеп кел, сен, жаным , ерке назбен,
Айдындағы үйлесіп аққу-қазбен,
Жанарыңда жүзбесін ашу, қайғы,
Жарасып бір жүрсеңші мәңгі жазбен.
Күлімдеп кел қасыма, тұнжырама,
Қарақаттай көзіңе мұң шылама.
Алтын таңдай жүзіңді ұнатамын,
Ақ бидайлы секілді нұрлы дала!
Күлімдеп кел сен маған күндей болып,
Түнерсем де кейде мен түндей болып,
Жауқазын-жыр төгілер жүрегімнен,
Өзің тұрсаң қып-қызыл гүлдей болып.
Күлімдеп сен келсең ғой, пай, қашанда,
Күлкі барда күмістей Айға асам ба?
Күңіреніп жүргенде жаным менің,
Көңілімді аулашы анда-санда,
Күлімдеп кел жаныма қай-қашанда.