Өлеңдер ✍️

Осы бір пікіріме келісіңіз,
Тіреліп тұрамаса да көп ісіміз,
Ауыздың дәмі кейде келе алмайды
Қышқылдау болмаса егер борышыңыз.
Ал енді мынаны кім түсінбейді,
Отынсыз ешкім тамақ пісірмейді.
Сорпаға тұз салмасаң сорпа емес
Тәттісіз шайыңыз да ішілмейді.
Дастархан жайылып бір сәніменен,
Дәстүрі.
Салтыменен,
Мәніменен.
Тамсантып, таңдайыңды үйіреді
Әр тағам өзіндік бір дәміменен.
Тер шықпай ауырғанда құрыстанып,
Түзеліп алу үшін дұрысталып.
Қуырып пиязы мен сарымсағын
Ішесіз көжеңізді бұрыш салып.
Білеміз небір қилы астың түрін,
Солармен шығарамыз бастың суын.
Кей-кезде кіл тәттіден безе қашып
Іздейсіз тағамның бір ашқылтымын.
Көңілде небір қызық болады сәт,
Өмірдің жаны дәмді,
Шарабы – шат.
Лимонад,
Газводаны сүйіп ішіп,
Кей-кезде кәмпит жейсіз бала құсап.
Ал кейде несіне оның аянасыз,
Несіне жағыңызға таянасыз.
Тәбетің тартып кейде сүт тағамын
Ұйқыдан айран аңсап оянасыз.
Соқпасын,
Соқсын зауқым асқа менің,
Соныңның бәрін былай тастар едім.
Ас емес құлқынымды құртып қойған
Айтайын дегенім де басқа менің.
Сәтсізің көп өмірде,
Сәтті ісің де,
Болды ол мұң түрінде,
Бақ пішінде.
Мәселе,
Мәселеңіз ас та емес
Өмірдің ащысы мен тәттісінде.
Қашанда кете алмайсың көңілді үзіп,
Бәрінен өт, тілегім, жеңіл жүзіп.
Айт-айтпа оларыңды сөз шығын қып
Ащысы,
Тәттісімен өмір қызық.
Жүрегім әділ менің,
Адал менің,
Болса да кемшілігім,
Жаман жерім.
Ағайын,
Артығырақ басқалардан
Ылғида тым биікте болам деуің.
Айтқаның дұрыс шығар керегіңде,
Өзіңнің ақылыңның көлемінде.
Ешкімді сендірмейді бұл заманда
Мен жалпы бақытсызбын дегенің де.
Ешкімнің де ештеңеге сенгісі жоқ,
Туған соң қалу керек шоң кісі боп.
Тіресіп,
Күреседі тіршілікте
Бәрі елдің бақыттырақ болғысы кеп.
Бұл өмір асу-асу, үзік белес,
Бір беткей бұзық та емес,
Түзік те емес,
Күрессіз,
Асуларсыз,
Асуансыз,
Жеңіссіз,
Жеңіліссіз қызық та емес.
Жеңіл ой керек емес, жеңіл егес,
Биікте шақырады мені белес.
Кейде шын қиындықсыз,
Ауырлықсыз
Өмірің мағыналы өмір емес.
Туған соң адамзаттың баласы боп,
Адамның құласы көп,
Аласы көп.
Басқа үшін басын байлап өз еркімен
Ешкімнің қайғы жұтар шамасы жоқ.
Демеймін бұл өмірден артық алам,
Адамның құдіреті барда арқыраған.
Ешкімге залалымды тигізбестен
Мен-дағы керегімді тартып алам.