Өлеңдер ✍️

Кәдімгідей күшейеді жел кейде,

Жайлап қарап, көк аспанға, желкенге.

Жүзіп келем ақ кемеде, теңізде,

Бір күдікпен,

Бір үмітпен ертеңге.

Бір күдігім - жауыны мен дауылы,

Бір үмітім - долы судың сабыры.

Оу, алыста өткен күннің сағымы,

Жетер алда,

Жеңілі мен ауыры.

Жалықтырыр, жәй тыныштық көркем бе?

О, жүрегім,

Өз-өзіңнен өртенбе!

Абайлайды, қарайлайды әр адам,

Бір күдікпен,

Бір үмітпен ертеңге.

Қайғы дағы, қуаныш та әлі бар,

Бақыт үшін күш-қуаттың бәрін сал!

Дейді бұлттар,

Тағы айтты, ақырын:

Жеңілістің, жеңістің де дәмін ал.

Тасып тұрып, талай күйді шертем де,

Құшағымды жайып қойып мен кеңге...

...Тамашалап таңын, кешін батырам,

Бір күдікпен,

Бір үмітпен ертеңге.