Шығармалар ✍️

Қазіргі таңда технологияның дамуы адам өмірін жеңілдеткенімен, қоғамға жаңа мәселелерді де ала келді. Солардың бірі – лудомания, яғни құмар ойынға тәуелділік. Бұл тек бір адамның ғана емес, тұтас отбасы мен қоғамның мәселесіне айналып отыр.

Құмар ойындар алғашында оңай ақша табудың жолы сияқты көрінуі мүмкін. Алайда уақыт өте келе адам оған тәуелді болып, қаржылық қиындықтарға тап болады. Көптеген азаматтар несие алып, қарызға батып, бар жиған-тергенінен айырылып жатады. Тіпті кейбір отбасылардың ажырасуына, психологиялық күйзеліске ұшырауына да осы дерт себеп болып отыр.

Біріншіден, лудомания жастардың болашағына үлкен қауіп төндіреді. Әлеуметтік желілер мен түрлі жарнамалар құмар ойындарды тартымды етіп көрсетеді. Соның салдарынан жастар еңбекпен жетістікке жетудің орнына, оңай жолмен ақша табуға ұмтылады. Бұл олардың білім алуына, өзін-өзі дамытуына кері әсер етеді.

Екіншіден, лудомания ел экономикасына да зиян келтіреді. Құмар ойынға тәуелді адам өз табысын пайдалы іске емес, ойынға жұмсайды. Нәтижесінде отбасының материалдық жағдайы нашарлап, әлеуметтік мәселелер көбейеді.

Мамандардың айтуынша, лудомания – жай ғана жаман әдет емес, психологиялық тәуелділік. Сондықтан онымен күресу үшін мемлекет, отбасы және қоғам бірлесіп әрекет етуі қажет. Ақпараттық жұмыстарды күшейтіп, жастар арасында қаржылық сауаттылықты дамыту маңызды.

Қорытындылай келе, лудомания – көзге көрінбейтін, бірақ салдары ауыр дерт. Әр адам өз өмірінің құндылығын түсініп, уақытын да, қаражатын да пайдалы мақсаттарға жұмсауы керек. Себебі болашақ – кездейсоқ ұтысқа емес, адал еңбек пен білімге сүйенгенде ғана жарқын болмақ.

Ануарбекқызы Інжу

11«Ә»сынып оқушысы