Жұмбақтар жауабымен: Техника, көлік, шеберхана құралдары (1)

Жұмбақтар жауабымен: Техника, көлік, шеберхана құралдары (1)

Шаңға толған шанағы,
Қоқыр-соқыр – тамағы.
Шаңсорғыш

Онда би де, күйің де,
Қызығына қанбайсың.
Отырып-ақ үйіңде,
Дүниені шарлайсың.
Теледидар

Су бетінде үйрек жүр,
Қалт-құлт етіп билеп жүр.
Қайық

Тізбек үйлер көшіп жүр,
Жолын жұрттар тосып жүр.
Жолаушылар пойызы

Құрылыста керік тұр,
Керегіңді бepiп тұр.
Көтерпіш кран

Он таңбалы цифрлы,
Әрекеті сиқырлы.
Терсең болды сандарын,
Сөйлер керек жандарын.
Телефон

Қырық екі тілі бар,
Тық-тық еткен үні бар.
Оның тілін тек қана
Маман жандар ұғынар.
Жазатын машинка

Сүймейді тоқтауды,
Сүйеді таптауды.
Асфальтты илеген
Көрдің бе оқтауды?
Асфальт таптайтын машина

Дауысы да ілеспес
Өзі ұшқан қарқынға.
Созған шүйке іспеттес
Жол қалады артында.
Реактивті самолет

Жылжымалы жақ,
Бұлжымалы жақ.
Оңға бұрап бақ,
Солға бұрап бақ —
Үлкенге де шақ,
Кішіге де шақ.
Универсал кілт

Иығына ал шығып,
Тұмсығынан шаншылып,
Күндіз қазып, түн қазып,
Берсін талай ін қазып.
Бұрғы

Жеген асы шығады желкесінен.
Сүргі

Төбесінде өмір бақи төбелес,
Төзіміне оның ешкім тең емес.
Темір төс

Екі езуі құлағына жетеді.
Тамақ жесе ызың-ызың етеді.
Ара

Жалпақ желке, сопақ бетті
Орманымды отап кетті.
Балта

Сыңар құлақ батыр
Шылым тістеп жатыр.
Іскенже

Шам, плита жұмысын жасай қалды,
Ал оның есептен-ақ басы айналды.
Электросчетчик

Құйрығы інге кірсе,
Беті өртенген.
Шегіне шегі тисе,
Қатер төнген.
Электроплитка

Апам үшін қам жеген:
Тозаң жұтып, шаң жеген.
Жатыр үйде айдаһар,
Ондай мешкей қайда бар?
Шаңсорғыш

Жүріп кетсе жүйрік бір
Лып-лып етіп ойнаған.
Кереметі:
Құйрық бір
Құтаймай-ақ қойды оған.
Ине

Бұл тұлпар су ішпейді
Жем жемейді.
Ескеріп ешбір адам емдемейді.
Жүк емес жануарға жүз адам да
Киіп ап төрт дөңгелек дөңгелейді.
Автобус

Төбесінде ебелек,
Ұшады өзі керемет.
Тікұшақ

Биологияда бұл паразит,
Көзге зорға көрінер.
Информатикада өлшем бірлік,
Ақпаратты өлшер.
Бит

Ақпараттарды шығарады,
Бұл құрылғы қалай аталады?
Баспа құрылғысы, принтер

Төртбұрышты әйнек
Тұнып тұрған әлем.
Монитор

Жануарға ұқсас атым бар,
Бағдар көрсетер затым бар.
Кілемше үстінде тұрамын
Ең қажетті құралмын.
Компьютер тышқаны

Өзі сөйлей білмейді,
Бірақ «Тоқта, жүр!» дейді.
Бағдаршам

Арқаным бар тым ұзын,
Ала-алмайсың бір үзім.
Табыңдаршы, балалар,
Бұл жұмбақтың шешуін.
Жол

Көліктің қаншасын үстінен өткізген,
Іргеден басталып, алысқа жеткізген.
Жол

Ала таяқ ұстаған,
Жол тәртібін нұсқаған.
Өміріңді күзеткен,
Ысқырықпен түзеткен.
Милиционер

Көкке қараған, жұлдыз санаған.
Телескоп

Туыстарын шетінен,
Өбеді де бетінен.
Бала-шаға ұсағын,
Бауырына қысады.
Магнит

Аса қажет өмірге халық үшін,
Пайдаланамыз күн сайын жарық үшін.
Ток

Қалпақты жымырады,
Төбесінен ұрады,
Түзетуге қыңырды,
Дәйім дайын тұрады.
Балға

Бір қыры- балта,
Бір қыры –балға.
Ағашты шапқан,
Шегені қаққан.
Шаппа шот

Азулы хайуан- темір ер,
Әндетіп сүйек кемірер.
Ағаш кескіш ара

Ізі бар, адымы жоқ аяғының,
Тимейді ұшы жерге таяғының.
Хайуанға екі аяғын арта салып,
Келеді әнін шырқап баяғының.
Арба, дөңгелек, дәрте, дауыс

Теріден қуыстап,
Аузына ағаш сап қайыған.
Қарашы дұрыстап,
Іші толған сайман.
Талыс

Ә дегенше тап береді,
Тап бергеннен қақ бөледі.
Балта

Қыста демалып, жазда тынбайды,
Көкке атылып, жерге құлайды.
Субұрқақ

Менің үш көзім бар,
Бір көзім «кідір» дейді,
Бір көзім «жүгір» дейді,
Бір көзім «абайла» дейді,
«Қарап ал маңдайға!» - дейді.
Бағдаршам

Төрт аяғы дөңгелек
Қозғалады орнынан,
Жүреді ол дөңгелеп,
Жүйіткиді желменен,
Дауысы бар гүрілдек.
Машина

Сымға асылып,
Жүр асығып.
Дыз-дыз етіп жүрегі,
Сымнан ұстап жүреді.
Өзіне адам мінеді,
Ол не, ал кім біледі?
Троллейбус

Ұшады қанатсыз,
Зырлайды аяқсыз.
Зымыран

Екі басты айдаһар
Бәрін қырып жояды.
Екі аяқпен жер тіреп.
Қағазды жеп қояды.
Қайшы

Інді көп-ақ қазады,
Өзі шыға қашады.
Біз

Шайқап басын,
Бір төмен, бір жоғары,
Тұрса ол, Тосын
Үйде самал соғады.
Желдеткіш

Жалғыз аяқ, тілік ерін.
Тұмсығында найзасы бар.
Киімдерді тігіп керім,
Адамға көп пайдасы бар.
Іс машинасы

Гүлдері бар құлпырған,
Кең жазықтан аумайды.
Оған әркім ұмтылған,
Киім киер оңтайлы.
Мата

Бір басы — қамал,
Бір басы жәй ашық,
Аяғы төртеу,
Алаңы — самал,
Жатқанға жақсы жайласып.
Кереует

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇



Пайдалы сілтемелер:
» Ораза кестесі 2024 жыл. Астана, Алматы, Шымкент т.б. ауыз бекіту және ауызашар уақыты
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу

Соңғы жаңалықтар:
» Биыл 1 сыныпқа өтініш қабылдау 1 сәуірде басталып, 2024 жылғы 31 тамызға дейін жалғасады.
» Жұмыссыз жастарға 1 миллион теңгеге дейінгі ҚАЙТЫМСЫЗ гранттар. Өтінім қабылдау басталды!
» 2024 жылы студенттердің стипендиясы қанша теңгеге өседі