Ағаш сумен өседі. Қазақ тілі (орыс сыныбы), 3 сынып, дидактикалық материал.

МҰҒАЛІМГЕ АРНАЛҒАН НҰСҚАУЛЫҚ

Қазақ тілі оқулығы, 3-сынып, («Көкжиек – Горизонт» баспасы,

авторлары: Ф.Оразбаева, Ж. Дәулетбекова, Р.Рахметова, Л. Нұрмұханова)

7-бөлім: Су – тіршілік көзі

4-сабақ «Ағаш сумен өседі»

Бұл сабақта оқу мақсаттарына сәйкес оқушылардың тыңдалым және айтылым дағдыларын қалыптастыру көзделеді.

Сабақта ұстанатын қағидалар:

• Сабақты жоспарлау кезінде әр сыныптың ерекшеліктерін басшылыққа алуды ұмытпаңыз;
• Аймақтың ерекшелігіне, тілдік ортаға, сыныптың деңгейіне қарай тапсырмаларды күрделендіруге немесе жеңілдетуге болады;
• Сыныптағы оқушылардың қажеттіліктерін (аудиал, визуал, кинестетик) ескере отырып, саралау тапсырмаларын беруге болады;
• Әр оқушының білім деңгейін, оның ілгерілеуі үшін не істеу керектігін білген өте маңызды;
• Оқушыларды үнемі қадағалап, қолдау көрсетіп отырыңыз;
• Сабаққа қажет ресурстарды алдын-ала дайындап, қажетіне қарай бейімдеңіз.
• Қазақ тіліне тән ерекше дыбыстардың дұрыс айтылуына назар аударыңыз.
• Ең басты міндет - мақсатқа жету.

Сабақтың тақырыбы мен мақсаты:

• Ұйымдастыру кезеңі психологиялық ахуалды туғызудан басталады. Оқушыларды қимыл-қозғалысына келтіріп, сабаққа зейінін аудартудан бастаңыз.
• «Белгісіз ақпарат» әдісі арқылы мұғалім сыныпты А және В оқушыларына бөледі. В-оқушылары теріс қарап отырғанда, А-оқушылары слайдтағы суреттің біреуін мұқият қарап шығады да, В-оқушысына суретті салдыртады. Ол үшін көргенін өз сөзімен сипаттауға тырысады. Сурет салуға 1 минут уақыт беріледі. Жұмыс аяқталысымен оқушылар түпнұсқамен салыстырады. Тапсырманы жүзеге асыру арқылы оқушы зейінін арттырумен қатар сабаққа деген қызығушылығын оята аласыз.
• Әр сабақтың басында мұғалім сабақтың тақырыбы мен мақсаттарын оқушыларға түсінікті тілмен жеткізуі керек. Оқушы осы сабақта нені игеру керектігін түсінуі керек;
• Сабақ барысында қажетіне қарай сабақ мақсаттарын оқушылардың естеріне түсіріп отырыңыз.

Жаңа сөздерді меңгерту:

• Жаңа сөздерді меңгерту - сабақтың ең басты кезеңі;
• Сынып оқушыларына «Дефиниция» әдісі бойынша жаңа сөздерді меңгерту (сөздер және сол сөздерге жазылған анықтаманы сәйкестендіру) арқылы сөздік қорын толықтыра аласыз. Оқушыларға кері байланыс «Мадақ сөздер» арқылы беріледі.

• Сабақ барысында жаңа сөздердің дұрыс айтылуы мен жазылуын бақылауда ұстауды ұмытпаңыз .

Тыңдалым мен айтылым

• Сынып оқушыларына тыңдалымалды тапсырмасын орындату арқылы сөз саптау шеберлігін ұштауға болады.
• Тыңдалымға қатысты сұрақпен сынып оқушылары танысып алғаннан кейін, тыңдалым тапсырмасы ұйымдастырылады. Оқушының мұқият оқуы қадағалануы тиіс. Себебі, тыңдалым тапсырмасы тек екі рет тыңдатылады.
• Тыңдалымнан кейінгі тапсырманы жүзеге асыру барысында оқушының дұрыс немесе бұрыс жауабы талқыланады. Не қиын болды? Неліктен? деген сұрақтар арқылы кері байланыс беруіңіз қажет.
• Айтылым тапсырмасында тыңдаған мәтін мазмұнын баяндауы, тірек сөздерді орынды қолдана алуы мен сөйлем құрылымына назар аударып отырыңыз. Оқушыға «Бас бармақ» әдісі арқылы кері байланыс бере аласыз.
• Берілген сурет бойынша тапсырманы қаншалықты сипаттай алғанын бақылауды ұмытпаңыз. Жұптық жұмыс орындаған оқушылар «1 жұлдыз, 1 тілек» әдісі бойынша бірін-бірі бағалайды.
• Тапсырманы орындағаннан кейін кері байланыс беруді ұмытпаңыз.
• Оқушылардың тапсырма негізінде шығармашылық қабілетін ұштай алуына мүмкіндік беріңіз.
• Сынып оқушыларының сабақ соңында рефлексиядағы белсенділігін үнемі қадағалап отырыңыз.