алу
👈 қаріп өлшемі 👉
қосу

Жұмбақтар жауабымен: Оқу жабдықтары, білім (1)

Жұмбақтар жауабымен: Оқу жабдықтары, білім (1)

Денесi бар шыбықтан,
Темiр тұмсық құдықтан,
Сусын алып iшедi,
Ойы iз боп түседi.
Қаламсап

Iлулi тұр кең алаң,
Керегiмдi мен одан.
Жазып алам көшiрiп,
Сүртем сосын өшiрiп.
Тақта

Үстiнде есiгi,
Өзi орындық, әрi үстел,
Оқушылар бесiгi.
Парта

Денесі жүрген сайын аласарып,
Сызады алуан кесте тамаша ғып.
Болғанмен діңі қатты, тілі тәтті,
Балалар жатады оны таласа алып.
Қарындаш

Жез күркенің ішінде
Қара құлын кісінер.
Қоңырау

Күмiс алмұрт тiлi бар,
Сыңғырлаған үнi бар.
Шақыратын бiлiмге,
Сағаты бар, күнi бар.
Қоңырау

Бар ойынды жиямын,
Ақ қағазға құямын.
Сия

Тiл жоқ өзiнде,
Сөзi бар iзiнде.
Қаламсап

Ойларынды аңсаған,
Асыл сөздi ақ алаңға,
Түсiруден шаршаған,
Мен емеспiн әмәнда.
Қалам

Қысқа таяқ дiңi бар,
Шиырлаған iзiнде
Сайрап тұрар тiлi бар.
Қарындаш

Қабы сояу,
Дiнi – бояу.
Қарындаш

Ұшымен қазық
Тор көздi жазық.
Үстiне өттiм,
Асыл сөз жазып
Дәптер

Бiлiмнiң дәнiн тередi,
Балаға тәлiм бередi.
Ұстаз

Шәкiртке жанашыр,
Мейiрман кiм, жаны асыл?
Ұстаз

Шұқшитқан кеп әуелі,
Сені әрбір әріпке.
Суреттері әдемі,
Бұл қай кітап?
Әліппе

Жіп-жіңішке денесі,
Ортасында шегесі.
Қарындаш

Жақсыменен тең көрген,
Ата-ана да жөн көрген.
Орындықпын төңкерген.
Төрттік

Жалғас жатқан қос шеңбер,
Бүйірінде қақпасы.
Көрсең де оны дос сендер,
Жақсы, жаман ортасы.
Үштік

Жалқаумен бір жүретін,
Құдды қармақ ілетін.
Жоламайды зерекке,
Сабақтарын білетін.
Екілік

Басында аздың ақылы,
Селқостардың жақыны.
Бірлік

Кiшкене құдықтан,
Найза ұшты шыбығым,
Су iшiп құныққан.
Сиясауыт

Жазу жазып жалықпаған,
Жаза-жаза арықтаған.
Бор

Бiлiмнен мол сый-асы,
Балғындардың ұясы.
Мектеп

Тазалап ақ қағаз жүзін,
Жоқ етер қарындаш ізін.
Өшіргіш

Сансыз ойлар бетінде,
Сайрап жатыр бар тілде.
Қажетпін мен әр күнде,
Өшпейді бір әрпім де.
Қағаз

Төрт қырлы, өзі аппақ,
Тақтадағы ізі аппақ.
Бор

Оқуыма төреші,
Тоқуыма төреші,
Парақтасам байқалар,
Білімімнің өресі,
Онда және жазылған,
Кестем де бар келесі.
Күнделік

Былғанышты жақтырмайды,
Ол бар жерде дақ тұрмайды.
Бірақ тағы өз үстінен,
Таза бір жер таптырмайды.
Сорғыш

Оқушыға күнде еріп.
Жүретін не?
Күнделік

Көкқұтанша ақ айдында,
Бір аяқпен тұрады.
Тұмсығымен ол мұнда,
Шыр айналып шығады.
Циркуль

Қаласы бар, елі жоқ,
Даласы бар, шөбі жоқ.
Мұхиты бар, суы жоқ,
Орманы бар, нуы жоқ.
Шыңдары да теп-тегіс,
Құмдары да теп-тегіс,
Кең жазықтан әр түсті,
Шығыс пенен батысты —
Бар Әлемді табасың,
Өзің таң боп қаласың!
Географиялық карта

Жұқа тақтай бөлшегі,
Ұзындықтың өлшемі.
Сызғыш

Бөлінгенді табыстырып,
Біріктірсе қабыстырып.
Жымдастырған жігін де,
Байқамайсың түгін де.
Желім

Сағат сайын қағылады,
Тек мектептен табылады.
Қоңырау

Бар ойыңды жиямын,
Ақ қағазға құямын.
Сия

Тіл жоқ өзінде,
Сөзі бар ізінде.
Қаламсап

Бес кісі тәуекел деп түсті жолға,
Сенгені бесеуінің жалғыз жорға.
Басқаны сол жорғаның бітті болды,
Кетеді қамшыласа оң мен солға.
Қол мен қалам

Бес үйрек суда жүрер саныменен,
Қаршығам төңкерілер айнаменен.
Жұмбақты табар болсаң, ойланбай тап,
Бір аққу жолдас болған бәріменен.
Бес саусақ, қалам, қағаз

Үш батыр қолдарына алды найза,
Су ішіп бір құдықтан етер пайда,
Бірінсіз бірі жұмыс ете алмайды,
Тарайды еңбектері талай жайға.
Қалам ұстаған үш саусақ

Бір кісі он әскермен жүреді ылғи,
Әскері мұздан бөрік киеді ылғи.
Кісі отырып, әскері қызмет қып,
Еңбегі иесіне тиеді ылғи.
Он саусақ, сия

Зерек бала қолданса,
Көңлі тояр.
Жалқау бала қолданса,
Қол-аяғын бояр.
Сия

Басын қырқамын,
Тілін жарамын,
Су беремін,
Сонан соң өзі сөйлейді.
Қауырсын қалам

Адамсыз кетеді,
Айтса тарих тұрады,
Тағдырда жазған.
Кітап

Өзі саңырау,
һәм айтады,
һәм үйретеді.
Кітап

Жүзі бар сәнді сұлу ондап, мыңдап,
Сыры бар неше алуан тұрсаң тыңдап.
Жүрмейтін жері де жоқ әлемде оның
Қадірі мейлінше зор, ол неткен зат?
Ізінен іздегендер жол табады,
Олжаны аздап емес мол табады.
Кітап

Темір аяқты,
Ағаш таяқты.
Циркуль мен қарындаш

Қобдиында қайырлы,
Қазынаның бәрі бар.
Тауыссаң көз майыңды,
Қалағаның табылар.
Кітап

Емес ол кітап та, дәптер де,
Жүреді бірақ та портфельде.
Көрсетіп ондағы бағаңды,
Қуантып қоясың ағаңды.
Күнделік

Тұрады ылғи сөреде,
Іші толы өнеге.
Кітап

Оқушыға мақтанды
Бір серігі аз ғана:
«Күнде кешем ақ қарды,
Қыс түгілі жазда да».
Қалам

Кейінірек оқу үшін сақтап қойыңыз:


Қарап көріңіз 👇



Жаңалықтар:
» Оқушылардың соңғы қоңырау мерекесі 1 маусымда өтеді 05.02.2023
» Ультракүлгін лак кептіргіштер қатерлі ісік ауруын тудыруы мүмкін 02.02.2023
» Қазақстанға 5G қашан келеді? 28.01.2023

Келесі мақала, жүктелуде...
Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы