Жұмбақтар жауабымен: От пен жарық (2)

Жұмбақтар жауабымен: От пен жарық (2)

Қарынды, баста қылған, аяғы үш,
Зат бір, пошымдары не түрлі-түсті,
Қарнына таяқ тығып піспектесең,
Ысқырып күрілдейді қайнайды күш.
Осындай түсі суық мақұлық бар,
Ойланып ақылдылар жұмбағым шеш.
Примус

Көмір шайнап,
Темір құсады.
Домна пеші

Бір ұяда топтасқан,
Түртіп қалсаң, от шашқан.
Шырпы

Тетіктерін бір бассаң,
Қараңғыға нұр шашқан.
Электр шамы

От қойсаң — жалын шығар,
Бос қойсаң — жаның шығар.
Газ

Қабырғаға қасынар,
Былғауыш басы бар.
Сіріңке

Үй үстінен
Көкке өрлеп шығады,
Әуе ішінен,
Із-тұз жоқ боп тынады.
Түтін

Шудалары желпеңдеп,
Үйден шығып жатады,
Көкке өрлейді көлбеңдеп,
Бұлт болып батады.
Түтін

Салып ем шыны сарайды,
Тілінен жарық тарайды.
Шам

Өңеші кең,
Дәу аузымен жұтады.
Төбесі дөң,
Кіші аузымен құртады.
Пеш

Құйтымдай сандықтың,
Суырмасы толып тұр,
Қажетті заты сан жұрттың.
Сіріңке

Қимылы оңдырмас,
Кішкене қоңырбас.
Сіріңке

Түсі нарттай,
Тілін тартпай.
Жолға шықса,
Қоймайды құртпай.
От

Жердің әрін жейді,
Жолда кезіккеннің,
Аямай бәрін жейді.
Бұл қандай алпауыт?
Айта ғой, дәл тауып?
Өрт

Жүрген жерін жалмайды,
Тастан басқа қалмайды.
От

Қып-қызыл кезінде,
Бет қаритын жапырақ,
Табы қайтқан кезінде,
Сұп-сұр майда топырақ.
Шоқ пен күл

Шеңбердің үш тағанын,
Қаракөлдің табанын,
Қызыл сиыр жалап тұр,
Терлеп, буы тарап тұр.
Қазан, жалын

Күндіз жанбайды,
Түнде маздайды.
Шырағдан

Білтесі жоқ, майы жоқ,
Жарқырап от жанады.
Тұтанады шырпысыз,
Өзінен ұшқын шығады.
Электр жарығы

Судан шығып жалаңдайды бір жалын,
Аузында алтын балық жарқыраған.
Жыланның тіршілігі суыменен,
Су құрыса балық өлер әрі жылан.
Шамның білтесі, жалыны, керосин

Бір жылан су ішінде жуан қарын,
Басы аппақ, тілінен шығар жалын.
Түн ішінде адамға пайдасы көп,
Күзетіп бақылайды адам қалін.
Майшам

Жіңішке жуан емес, өзі арық,
Тілі шықса дүниені қылар жарық.
Сүйегі жоқ, денесі жұмсақ өзі,
Суға салса батпайды сондай парық.
Майшам

Бір түйем бар қамыстың басын жейді,
Шу-шулесең жануар бір жүрмейді.
Қағып-соғып шандаққа шөгерсем де,
Төс табаны сірә бір жер тимейді.
Шам

Ақ шатыр, ақ шатыр,
Ақ шатырдың ішінде
Қызыл көзді шал жатыр.
Шам

Арықтаса сөнеді,
Адам үшін көнеді.
Мінезі жаман өзінің,
Білдірмей тебеді.
Шам

Бір тілім ет не қаны жоқ,
Азғана май қорегі,
Тапсаң ойлап, тез шешіп,
Жауабын кім береді?
Шам

Бір тастың қақ басында құдығы бар,
Құдықтың айналасы бәрі де жар.
Білте шам

Бір тон бар өте әлді болған түзік,
Ешкімге қарамайды түсін бұзып.
Жаман-жақсы пайдасы көпке бірдей,
Сол себепті біз көрдік қанша қызық.
Шам

Жапанда бір бәйтерек жалғыз біткен,
Басына бір азамат мекен еткен.
Пайдасы жұртына бар, өзіме жоқ,
Басынан алтын шоғы ұшып кеткен.
Шам

Кілті жоқ суырмалы бір сандық бар,
Ішінде елу екі тайлағы бар.
Тайлақты қасына алып еңбек еткен,
Адамға оның өте керегі бар.
Сіріңке

Іші алпыс, екеу екен сырттан қабы,
Байланыс тіршілікпен мұның жаны,
Сырты да әкесінен ажыраса,
Ешқандай болмайды екен мұның сәні.
Пайдалы адамзатқа болғаннан соң,
Қолынан тастамайды елдің бәрі.
Сіріңке

Қамалып бір сарайда солдат жатқан,
Далаға шыққандары мылтық атқан.
Салмағы аз бұл сарайдың солдатында
Ойланып милы кісі мұны тапқан.
Сіріңке

Өзі ала,
Жан-жағы қара,
Ортасында бала,
Баласының басы қара.
Сіріңке

Сен өзің сандықсың ба, сарайсың ба,
Қайтадан мүлік болып жарайсың ба?
Сіріңкенің қорабы

Ағаштан үй салдырдым аузы ашық,
Ішінде елу жігіт қылар кәсіп,
Біріне ажал жеткен уақытта
Кетеді жанып, елге пайда шашып.
Сіріңке

Кішкене ғана мүсәтір,
Ол мүсәтір жоқ болса,
Елдің бәрі мүсәпір.
Сіріңке

Тас таяқ қағысар да соғысар,
Ортасында бөдене, қырғи келіп қағысар.
Шақпақ тас

Пеш ішінде отырмын,
Өзім шикі қотырмын,
Қотырыма тимеңдер,
Өлейін деп отырмын.
Шала жанған қоламта

Болат жапырақ,
Батпан топырақ.
Шоқ, күл

Көк көйлекті жеңешем
Көлбең-көлбең етеді,
Артындағы баласы
Елбең-елбең етеді.
Түтін

Қарны жуан қампайған,
Серейіп бойы талтайған.
Ерте-кешке бір жазық,
Тапа-тал түсте жантайған.
Түтін

Жұмбағым жұтылды,
Көкке қарай тұтылды.
Түтін

Ана ауылдың бурасы,
Мына ауылдың бурасы,
Желкілдейді шудасы.
Түтін

Көк лағым көлеңкеде сүйретіліп барады.
Түтін

Ұзыннан ұзақ,
Көкке тұзақ,
Балапан жапырақ,
Батпан топырақ.
Түтін мен күл

Үсті бүтін,
Іші түтін.
Тандыр пеш

Мың дозақ қиямет дерсің,
Ішіне нанды пісіріп жерсің.
Тандыр пеш

Қуаты ыссы керемет,
Үйге лебін жаяды.
Пеш

Аузы іште, мойны сыртта,
Бар жылуын берер жұртқа.
Пеш

Қозғалмайды, үш аяқпен тұрады,
Ауыл көшсе, шаңырақта тұрады.
Ошақ

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇



Пайдалы сілтемелер:
» Ораза кестесі 2024 жыл. Астана, Алматы, Шымкент т.б. ауыз бекіту және ауызашар уақыты
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу

Соңғы жаңалықтар:
» 2024 жылы студенттердің стипендиясы қанша теңгеге өседі
» қазақ тілі тестілеуде_келген_сұрақтар_зерттеуші
» Наурыз мейрамы Қазақстанда жаңа форматта тойланады