Жұмбақтар жауабымен: Ыдыс-аяқтар (қасық, дастархан, сүзгі, үстел, құмыра, ыдыс, термос, кесе, оқтау, пышақ)

Жұмбақтар жауабымен: Ыдыс-аяқтар (қасық, дастархан, сүзгі, үстел, құмыра, ыдыс, термос, кесе, оқтау, пышақ)

Жер баспайтын аяғы,
Апамның ақ таяғы.
Жұдырықтай қамырды,
Жаулықтай ғып жаяды.
Оқтау

Кесе-кесе мұқалды,
Жони-жони жұқарды.
Пышақ

Аяғы жоқ, басы бар,
Іліп алған асы бар.
Тиген кезде қолыңа,
Аузыңа тез асығар.
Қасық

Сүті жоқ сыңар емшек,
Сәбилер құмар емшек.
Емізік

Сүңгіп жүр, жүзіп жүр:
Судан дәм сүзіп жүр.
Кепсер

Бес қаруы бойында
Универсал бәкі

Дос үйіне түстің бе?—
Түгел соның үстінде.
Дастарқан

Темір де, ағаш та емес,
Ыдыс, су құяды.
Шөлдерде қатады ес,
Мол су сияды.
Тұлып, мес

Қос құлақты ыдыс,
Тоқылады жүннен.
Ақ дәм, азық, дән салып,
Бабалар артып жүрген.
Қап, дағар

Бір ыдыс кергіштелген аузы арандай,
Құйған нәрсең өтеді аялдамай.
Тек түбінде қыл-қыбыр…
Қалар ылғай.
Сүзгі

Шеңберлi есiгi бар,
Жүздеген тесiгi бар.
Iшiне кiргендердiң,
Ұсағы жол табады,
Iрiсi тор қабады.
Ыдыс-аяқ бөлмесi,
Тазалықтың көрмесi.
Әбдiра

Бiреу есiгi,
Тұбiнiң
Көп-ақ тесiгi.
Елгезер

Ұшы үшкiр, сабы бар,
Екi жүзi қайраулы
Бауы менен қабы бар,
Белде жүрер байлаулы.
Қанжар

Құдықтың iшiнен,
Құдық көрдiм.
Бiрiнде – су қайнайды,
Бiрiнде – от жайнайды.
Самауыр

Иiнiнде құлағы,
Iшiнде бұлағы.
Көмейiне от салсаң,
Ызыңдап тұрады.
Самауыр

Мөлдір түрі,
Шеңбер түрі.
Аузы тарлау,
Шыны күбі.
Құмыра

Төртеу адамы,
Біреу алаңы.
Үстел

Ыдыс-аяқ бөлмесі,
Тазалықтың көрмесі.
Әбдіра

Қынама бел толықша,
Тапал ғана бойы бар.
Адамдарға жолықса,
Таяқ жейтін жайы бар.
Өзінің дәу аузы бар,
Түбі бітеу, аяғы бар,
Дәнді түйер қауызы бар,
Шомбал таяғы бар.
Келі мен келсап

Көлшікте жүзіп,
Түбін шарлап шығады.
Қауғасы сүңгіп,
Балығын аулап шығады.
Кепсер

Басы құдық —
Сабы сырық.
Ожау

Қалпағы бар,
Басы жоқ.
Тұтқасы бар,
Топсасы жоқ,
Аузы бар,
Тісі жоқ.
Қарыны бар —
Кіші тек,
Түтігі бар —
Көші көп.
Шәйнек

Аузы төбесінде,
Тұтқасы денесінде.
Құман

Қақпағы бар, жез құдық,
Сусыны ыстық кез құдық.
Ортасында оқпаны,
Онысының от жаны.
Самауыр

Күміс күбі —
Ортасында құбыры бар,
Тесік түбі.
Самауыр

Сыртын отқа қақтайды,
Одан басқа жақпайды.
Қазан

Төңкерсең күмбез сынды,
Шалқайтсаң құдық сынды.
Жиегінде қос құлағы бар,
Тік көтерген үш бұтағы бар.
Қазан

Бір хайуан ұзын түсіп, жатыр сулап,
Адамзат көтермесе кетер құлап,
Бетіне келген жанды тіліп тастап,
Қозғалар адамнан тек көмек сұрап.
Пышақ

Басы ұяда,
Құйрығы қияда.
Шөміш

Үйректің өзі тереңде,
Ақ құйрығы ернеуде.
Шөміш

Ішкен суын шұңқырға құяды.
Шөміш

Жаңа табақ түбі тесік,
Тақ-тақ етті,
Астынан керуен өтті.
Елеуіш астынан өткен ұн

Аласа үйден қар борайды.
Елгезер

Жоғарыдан асқан,
Ортасына көр-жөр басқан.
Аяқ қап

Тамаша құстар көрдім құйған қыштай,
Қапаста жатыр алтау іші пыспай,
Қапастан сол алтауы шыға келсе,
Қылады әркім құрмет қолын ұстай.
Кесе қап

Кең балақтың ішінде
Кетпен сап болады.
Күбі

Жансызда бір жансыз бар тоймайтұғын,
Қолында шоқпары бар қоймайтұғын,
Белінде үш-төрт жерден белбеуі бар,
Өзі өлмесе, белбеуі тозбайтұғын.
Күбі

Үлкен келін есік ашты,
Кіші келін ұрып қашты.
Келі мен келсап

Бір бием желіні жетіп егіз тапқан,
Айғыры туар күні үйірін тапқан.
Бірі ұлпал, ласының бірі жаңқа,
Япырай, неткен зерек мұны тапқан.
Саба, піспек, май, құрт

Көк өгізім гүрілдейді,
Жансыз ағаш дірілдейді.
Саба піспек

Бір нәрсе аяғы бар, тұяғы жоқ,
Мойны бар, басы менен құлағы жоқ.
Артында бір көлденең ағашы бар,
Сонда да мал секілді сияғы жоқ.
Мес

Аузы бар да тілі жоқ,
Құйрығы бар да жүні жоқ.
Мес

Он екі аққу, бір тақыр,
Бір тақыр көлді жағалайды.
Шыныаяқ, поднос

Таңертең тұрып шатырымды құрдым.
Шайтабақ

Бір қарыс, екі тұтам бойы бар-ды,
Өзінің сақилықтан ойы бар-ды.
Құман

От басында таукешік.
Құман

От басында бүкір шал,
Тірлігіне шүкір шал.
Құман

Сылдыр-сылдыр сары айғыр,
Ашуланса кісінер,
Құлындары құла ала,
Құйрық жалы қара ала.
Самауыр, шәй, шыныаяқ

Аузы бар арқасында иегі жоқ,
Далаға кіріп шығар тірегі жоқ,
Күл менен жаңқа жеп, су ішеді,
Байғұстың онан басқа қорегі жоқ.
Самауыр

Арығы жоқ, жабы жоқ,
Су ағады сыртылдап,
Ортасында бір нәрсе,
Қызарады жылтылдап.
Самауыр

Қоқан бөркі басында, қос қоржыны қолында,
Ханда жақсы көрініп отырады қасында.
Өзен емес, көл емес, су ағады жылпылдап,
Ортасында бір нәрсе қызарады қылтылдап.
Самауыр

Ғаламат төрт аяғын басып тұрған,
Сырғасын құлағына асып тұрған.
Ысқырған айдаһардай айдыны бар,
Аузынан гауһар отын шашып тұрған.
Самауыр

Базардан алып келген алтын сандық,
Он жігіт омыраудан кілт салдық,
Су ішіп, көмір жеп, күл түскен.
Самауыр

Кішкене ғана келіншек,
Екі шелек су ішеді,
Бір адамды қинайды,
Көп адамды сыйлайды.
Самауыр

Анау тұрған нар ма екен,
Нар ботасы бар ма екен?
Табанында тас қойып,
Дәрет алған бар ма екен.
Самауыр

Бір ердің қарнында от жанады,
Қарамай өлгеніне шоқ салады,
Халықты айналдырып жиып алып,
Ол ердің бергеніне жұрт қанады.
Самауыр

Қарны қартас,
Мұрны бұртас,
Атқа мінбес,
Жаяу жүрмес.
Самауыр

Ақ сәлделі қожалар,
Зікір салып сұңқылдар,
Өз тамағы тойған соң,
Бейне жынды бұлқылдар.
Самауыр

Тұрады кісі келсе сары болып,
От пен су тұрады жары болып,
Ішінде қазынасы сол сары алтын,
Жақсылар бөліп алады бәрі болып.
Түйенің төрт табанындай табаны бар,
Мойынына сәлде салады кәрі болып,
Өзінде ашып кірер есігі бар,
Дәм татып шығатұғын тесігі бар.
Самауыр

Мұрыны бар кеудесінде ұзын тұрғы,
Салғаны құлағына үлкен сырға.
Басында кемерленген кепесі бар,
Бейнеті арылмайтын бір бишара.
Шәугім

Кiшкене тегештей
Қарыны бар кемештеу.
Құдды қайың берiшi,
Iшiнде шөл дәрiсi.
Саптыаяқ

Сым қуалап бойлайды,
Бұрқылдап іші қайнайды.
Әңгіме шертер мән жайлы,
Әжеңнің қамын ойлайды.
Электр самауыр

Тақия, мұрын, бір құлағы бар,
Самаурын қасында тұрағы бар.
Шәйнек

Ыстық құйып қой, мейлі,
Аязда да суытпас,
Суық құйып қой, мейлі,
Шілде айында жылытпас.
Термос

Кесе, шыны, пиала –
Оларсыз шай құяма?
Қасықсыз тамақ жемейді,
Бәрінің атын не дейді?
Ыдыс

Қара сиырым қарап тұр,
Қызыл сиырыс жалап тұр.
Қазан, от

Терi құдық қауғасын,
Тарттым да,
Қанып iштiм дәмдi асын.
Саба

Құлағы бар қалқиған,
Аузы бар аңқиған.
Шығып алып ерте-кеш,
Төрт аяққа талтиған,
Қыздырады жалынға
Дәу қарынын қампиған.
Қазан

Отқа қойсаң елпiлдеп,
Быж-быж етiп тұншығар.
Тақиясы селкiлдеп,
Танауынан бу шығар.
Шәйнек

Сабы бар,
Басы шатыр.
Табысын өлшеп әкеп,
Құдыққа тасып жатыр.
Қасық

Ыстықты суытпайды,
Суықты жылытпайды.
Термос

От ішінде үш таяқ,
Үшеуі де күшті аяқ.
Ортасында ілгегі.
Ілгегінде ілгені.
Мосы мен шәугім

Борп-борп борпылдақ,
Борпылдақта қызыл тақ.
Қызыл тақта үш тармақ,
Үш тармақта шұқыршақ,
Шұқыршақта бал қаймақ,
Балқаймақта сұр жайдақ,
Сұр жайдақта сері бойдақ.
күл, от, үш аяқты темір ошақ (мосы), қазан, ішіндегі тамақ, қақпақ, ожау

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇



Пайдалы сілтемелер:
» Ораза кестесі 2024 жыл. Астана, Алматы, Шымкент т.б. ауыз бекіту және ауызашар уақыты
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу

Соңғы жаңалықтар:
» 2024 жылы студенттердің стипендиясы қанша теңгеге өседі
» қазақ тілі тестілеуде_келген_сұрақтар_зерттеуші
» Наурыз мейрамы Қазақстанда жаңа форматта тойланады