Наталья Дементьева

Наталья Дементьева – Көкшетау гуманитарлы-техникалық лицейінің директоры
Ол «Нұр Отан» партиясының белсенді мүшесі. 2009 жылы Астана қаласында өткізілген партияның кезектен тыс съезінде еліміздің жастары мен мұғалімдерінің атынан Елбасының алдында сөз сөйлеу құрметіне ие болды.

2009 жылдан бастап 2016 жыл аралығында лицейдегі мұғалімдік жұмысын «Қазақстан-Көкшетау» Ақмола телерадиокорпорациясының тележүргізушісі қызметімен қатар алып жүрді. «Біз үйрендік!» (тақырыбы – өзге ұлт өкілдері арасында мемлекеттік тілді насихаттау), «Мың бір сөз» (қазақ тілінің теледидарлық сабағы), «Живой родник» (Қазақстанның танымал тұлғалары туралы), «Бір шағырақ астында» (Ақмола облысының Ассамблеясымен бірлескен жоба) атты өзінің авторлық жобалары бар, 2012 жылдың қыркүйек айынан бастап эфирге «Танымал» жобасы шықты. Мақсаты – еңбек адамының образын ашу. 2013 жылдың наурыз айынан бастап эфирге «Ақ дастархан» бағдарламасы шықты. Мұғалімнің «Живой родник» атты авторлық жобасы облыс мұғалімдерінің тарих, өзін-өзі тану, әдебиет сабақтарында белсенді қолданылады.

Наталья Григорьевна мемлекеттік тілді білудің әр түрлі деңгейі бойынша өткен конкурстардың бірнеше мәрте жүлдегері болды, олардың ішінде: 2002 ж.- «Государственный язык – мой язык» қалалық, облыстық конкурстарда 1-орын, 2003 ж. «Тіл – халықтың қазынасы» республикалық конкурсында 1-орын, осы жылы – «Ұстаз» номинациясы бойынша сертификат иеленді. Наталья Григорьевнаның оқушылары 15 жыл бойы өзге ұлт өкілдерінің арасында мемлекеттік тілді білу бойынша өткен конкурстардың бірнеше мәрте жүлдегерлері болып табылады.