Қатені табу және түзету. Әдебиеттік оқу, 4 сынып, дидактикалық материал.

ҚОСЫМША 1

Тау мен қаңбақ

(ертегі)

Бір қаңбақты жел айдап, үлкен таудың етегіне әкеп тастап кетті. Мұны биіктен көріп тұрған тау:

• Е, қаңбағым, қайдан жүрсің, неғып келдің мұнда?- деді.

Қаңбақ тұрып:

• Алты батпан ауырды көтерген алып едім. Жеті қабат жер астынан шығып, алып деген атыңды естіп, алысу үшін әдейі сені іздеп келдім,- дейді.

Тау бұған жымиып күлді. Сол кезде құйын соғып, қаңбақты дедектеткен бойы аспанға алып шықты. Аспаннан қайта жерге әкеліп, ары – бері аунатты. Ойға-қырға домалатты. Ақыр аяғы өлдім – талдым дегенде, таудың бетіне өскен бір шоқ тобылғының басына іліп тастап, жайына жүріп кетті. Қаны қашып, қабағы түскен қаңбақтың қасына бір бүркіт келді. Ол:

• Ей, қаңбағым, неғып жатырсың? – деді.

Қаңбақ:

• Алты батпан ауырды арқалаған едім. Жеті қабат жер астынан шығып, алып деген атағын естіп, астымда жатқан таумен әдейлеп келіп алысып едім, алты күн алысып, жеті күн дегенде әрең деп жығып, желкесінен басып жатырмын, - дейді.
• Болса болар! – депті бүркіт оған. –Тобылғыға зорға ілініп қалған екенсің!
• Әлбетте,- деді қаңбақ,- одан басқа қолайлы жер болмаған соң тобылғысынан ұстап жатқаным ғой.

Сол кезде құйын соғып, қаңбақты тағы да дедектете жөнелді.

Бүркіт тұрып:

• Е, батыр, қайда барасың тауды тастап? Тұрып кетпей ме ол енді орнынан? – деді.
• Уақа емес, бүркітім. Алдымда алысатын әлі де көп алыптар бар еді. Соларға жетуге асығып барамын!- деуге ғана шамасы келді қаңбақтың. Құйынмен бірге құлдырап, ұшып кете барды. Ақырында күліп, бүркіт пен тау қалды.

ҚОСЫМША 2

ҚОСЫМША 3

Оқиғаның дамуындағы өзгерістерді анықтап, ертегіні іштей түсініп оқы.

-Қаңбақтың Тауға берген жауабы қандай?

-Қаңбақ Бүркітке неліктен мақтанды деп ойлайсың?

-Қаңбақтың мақтаныш сезімі немен аяқталды? -Ертегідегі негізгі ой не туралы? Қандай қорытынды шығаруға болады?

ҚОСЫМША 4

ҚОСЫМША 5

Қатесін тап. Дәптеріңе түзетіп жаз.

Бір тауды жел айдап, үлкен қаңбақтың етегіне әкеп тастайды. Тау бұған қуанып күлді. Сол кезде жел соғып, қаңбақты дедектеткен бойы тауға алып шықты. Аспаннан қайта жерге әкеліп, ары – бері жүгіртті. Ойға-қырға ойнатты. Ақыр аяғы өлдім – талдым дегенде, таудың басында өскен бір шоқ тобылғының қасына тастап, өз бетімен жүріп кетті.

Дұрыс нұсқасы:

Тау бұған жымиып күлді. Сол кезде құйын соғып, қаңбақты дедектеткен бойы аспанға алып шықты. Аспаннан қайта жерге әкеліп, ары – бері аунатты. Ойға-қырға домалатты. Ақыр аяғы өлдім – талдым дегенде, таудың бетіне өскен бір шоқ тобылғының басына іліп тастап, жайына жүріп кетті