Ұрыс, дау, талас, жанжал, керіс, дау-дамай, шайқас, тайталас

Жақсы әйел – ырыс,
Жаман әйел – ұрыс.

Ерлі-байлы ұрысар да, керісер,
Көрісер де келісер.

Бір күн ұрыстың қырық күндік қырсығы бар.

Екі қатын ұрысса, ұрлығы мен қарлығын айтар.

Әскерлік оқудан бейнет көрсең,
Ұрыста қиналмайсың.

Өз үйінің жиырма күн иесі болса,
Бір күн ұрысы болады.

Керістен ұрыс басталар.

Қырсызбен ұрыссаң да,
Арсызбен ұрыспа.

Ұрысса да — өз жақсы,
Таласса да — өз жақсы.

Ұрысы күшті болса, иесі айыпты болады.

Ұрыс болса, ырыс қашады.

Ағайынның ұрысы — торқаның жыртысы.

Баласы көп болса,
Ұрыс бастайды.
Жылқысы көп болса,
Қоныс бастайды.

Бірі асайды,
Бірі масайды,
Шатақты солай жасайды.

Айтқан екен жайған адам атағын,
Сабыр еткен түзер істің шатағын.

Баймен айтыспа, палуанмен күреспе.

Аянбаған жауды алар
Абайлаған дауды алар.

Есі мақұл дауласса,
Сөздері асқар ала таудай болар.
Бір тентек, бір ақылды дауласса
Атысқан жаудай болар.
Екі тентек дауласса,
Сап-саудай болар.

Ханды құдай ұрғаны,
Халқымен жау болғаны.
Биді құдай ұрғаны,
Билігі дау болғаны.

Би жаманы дауға алдырады,
Жігіт жаманы жауға алдырады.

Болмайтын істің басында болма,
Бітпейтін даудың қасында болма.

Жылқылы елде жау көп,
Жатақ елде дау көп.

Атаның өспес ұлы
Өнбес дауды даулайды.

Суды шым бөгейді,
Дауды қыз бөгейді.

Жігіт жауда өлер,
Шешен дауда өлер.

Үш нәрсенің алдын ал:
Аурудың алдын ал,
Жаудың алдын ал,
Қайта қозған даудың алдынал.

Өрлеген балық ауға жолығар,
Өркөкірек жігіт, дауға жолығар.

Жаманның сөзін сөйлеме,
Жасықтың дауын даулама.

Батырсыған жігітті
Жау келгенде көрерміз.
Мен-менсіген жігітті
Дау келгенде көрерміз.

Даудың жолына түспе,
Жаудың қолына түспе.

Жау шақырып, аттан салма!
Дау шақырып, барымта алма!

Дау мен жау — ерге сын,
Көшіп-қонбақ — елге сын.

Дауды елемеген төлейді,
Ауруды елемеген өледі.

Екі қатын алғанның дау үйінде,
Жаман қатын алғанның жау үйінде.

Екі мақұл дауласса, сөздері асқар ала таудай болар.
Бір тентек бір ақылды таласса, атысқан жаудай болар.

Біреу ішуге су таппайды,
Біреу өтуге көпір таппайды.
Екі дәукес қосылмай,
Дау бітпейді тосылмай.

Үлкенмен бала дауласпас,
Қырғи мен сұңқар жауласпас.

«Бер» деген дауым болмаса,
«Ыңқ» деген ауруым болмаса!

Жаманның тонын кисең,
Тойда даулайды.

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇

10.05.2020