Қоныс той

Қоныс той

 «Отан – отбасынан, отбасы – ошақ қасынан басталады» деген екен бабаларымыз. Ал сол ошақтың иесі – әйел, ал отбасының иесі – сол үйдің ері. «Еркек – шаңырақтың иесі әрі асыраушысы» деп бекер айтпаған ғой.
Бүгін міне, жаңа үйге қоныс аударып, «Қоныс тойын» жасап жатырсыңдар.
Олай болса үй иелеріне тілерім: өздерің табалдырығын жаңа аттаған жаңа үйлерің берекелі, ырысы мол, Қыдыр қонған үлкен үйге айналсын. Шаңырақтарыңда тек қана той болсын дегім келеді.



 Бір данышпан «Керемет үй болмайды, үйді керемет ететін – сол үйдің әйелі. Ал үйдің шатыры – еркек. Өйткені ол сол баспананы ыстықтан, суықтан, жаңбырдан, қардан, селден қорғап тұрады» деген екен.
Құрметті үй иелері, мынау жаңа қоныстарың – баспаналарың құтты болсын!
Бірің – қорғаны, бірің – жылуы болып, қонақ үзілмейтін құтты шаңыраққа айналып, ақ дастархандарың тек қана тойға жайыла берсін! Қоныс тойларың құтты болсын! 


Қазақтың керемет сатирик жазушысы, өзгеше тағдыр иесі Садықбек Адамбеков жан досы, көп балалы Сырбай Мәуленов өмірден өткенде:
«Сен өмірден өтіп барасың,
орныңа орман өсіріп.
Мен тіккен үйімді жыға бастадым,
жаққан отымды өшіріп...» деп азанама жазыпты.
Жан досым менің! Бүгін сен де өз қорғаныңның иесі болып, қоныс тойын тойлап отырсың: әрқашанда басыңнан бақ таймасын, осы қорғанның іші шүпірлеген қарадомалақ балаға, олардың ырыс-несібесіне толып, осынау жаңа үйің құт дарыған берекелі шаңыраққа айналсын! «Қара қазан, сары баланың қамы үшін» жүзге жеткенше таңертеңнен қара кешке дейін жүгіре бер, қызықты да тыныш ғұмыр кеш!
Қоныстарың құтты болсын! Қуанышыңды бөлісуге шақырған мына көпшілікке жұғысты болсын!



 Көптен күткен үміттерің ақталып, жаңа үйге қол жеткізіпсіңдер, құтты болсын! Қуаныштарыңа ортақтасу үшін жиналып отырған мына қауымның сендерге айтар тілегі мол. Жаңа үйлеріңнің іргетасы мықты, керегесі кең, шаңырағы биік болсын! Ішінде тек қана татулық пен береке, қуаныш пен бақыт, құт пен ырыс салтанат құрсын! Өз бастарыңа бақ-береке дарып, бала-шағаларың өсіп-өне берсін, қызығын көріңдер! Шаңырақтарыңда қуанышты тойлайтын жиын көп болсын! Қайғы-мұңдарың жоқ болсын!



 Жаңа баспаналарыңмен бірге өмірлерің де жаңа ағысқа қарай бұрылып, жаңа да бақытты арнамен ағатын болсын!
Сөз шығар сай боп өреге,
Жүрекке Ақыл-ер – еге!
Ниетің түзу болмаса,
Басыңа бақыт қонар ма,
Қайсы үйге қонақ көп келсе,
Сол үйде Қызыр ереді!...
Алтын шаңырақ,
Биіктеп жайылар күміс кереге!
Ынтымақ ырыс-үйлесім,
Көргенді үлгі өнеге!
Сіздерден соны мен көрдім;
Түсіріп келін – сүйіңдер,
Немере, шөпшек, шөбере!
Әумин!



Беретін асың болсын,
Көретін жасың болсын,
Басыңнан жақсылық кетпесін,
Жамандық саған жетпесін!

Қайырлы болсын үйің,
Жақсы болсын күйің,
Алдарыңнан шықсын әрдайым,
Көрсеткен жұртқа сыйың.



Той-думан құтты болсын;
Бақыты мол отау болсын,
Іші жанға толсын,
Сырты малға толсын.

Өздеріңе ұзақ ғұмыр берсін,
Мәңгі кетпес ризық берсін,
Алдарыңнан күн шықсын,
Арттарыңнан ай тусын!


Өрісің кеңіп үй болдың,
Ие боп жаңа пәтерге.
Құлпырып тұр ғой көңілің,
Жуылғандай ақ нөсерге.

Шаттана ұстап кілтіңді,
Шалқайдың, досым, шат күліп.
Ұмыт боп күндер былтырғы,
Жұлдыз боп жанды тәтті үміт.

Көңіліңе күй күмбірі,
Жарың да жайраң қағады.
Түзелер енді тірлігің,
Қуанттың бала-шағаны.

Баспана болмай күйде жоқ,
Қажытар кісі есігі.
Дос-жаран тұрсын үйге кеп,
Тербетіп шаттық бесігін.

Көңілін тапқын көршінің,
Туыстай болар жұптассаң.
Қанатты қаққын серпіліп,
Еркің бар енді бассаң.

Өркендей берсін өренің,
Естіліп «іңгә» - әсем үн.
Кеңісін керегелерің,
Құт әкеп жаңа пәтерің!


Қажетті сілтемелер:

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇



Пайдалы сілтемелер:
» Ораза кестесі 2024 жыл. Астана, Алматы, Шымкент т.б. ауыз бекіту және ауызашар уақыты
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу

Соңғы жаңалықтар:
» 2024 жылы студенттердің стипендиясы қанша теңгеге өседі
» қазақ тілі тестілеуде_келген_сұрақтар_зерттеуші
» Наурыз мейрамы Қазақстанда жаңа форматта тойланады
Пікір жазу
Пікірлер 2
  1. Қоныс тойға тілек
    3 + 1 -
    Құрметті досым, енді сенің өз үйің бар. Сен мұнда неге болса да еріктісің. Өйткені үйдің қожайыны да, отағасы да өзің. Бірақ есіңде болсын: жалғыз адам патшаның сарайына да сыймайды. Мына жаңа үйдің табалдырығынан жас келінді аттатқызып, үйдің ошағына ие болатын отанасын әкел. Баласыз үйдің қу мазар екенін де білесің. Ендеше бүгін жалғыз отырған шаңырағың ертең кішкентайлардың шат күлкісі мен той-думанына толсын! Сонда ғана сенің үйіңнің төрт құбыласы тең болмақ!



    Азамат ер жете келе өз қонысы жайлы ойлауы керек. Тіпті құс екеш құс та балапандарын басып шығару үшін алдымен ұя салып алады. Адамның құстан несі кем? Міне, сен өз ұяңды салып бітірдің! Енді балапандарың жаурамайтын да, жалтақтамайтын да болады.




    Біз бүгін өз арамызда тарихи сәттің куәсі болып отырмыз. Өйткені біздің досымыз пәтерлі болды. Бұл көптің күткен қуанышы. Осы үйде тек қана той-томалаққа жиналайық!



    Айналайын, пәтерлі болып отырған үй иелері, сендерді бүгінгі қуаныштарыңмен құттықтаймыз. Құрметті жиналған қауым, қолымызды жайып тұрып, Алладан бұл үйдің есігінің барлық жаманшылықтар мен бақытсыздықтар үшін тастай жабық болғанын, барлық сәттіліктер мен жақсылықтар үшін айқара ашық болғанын тілейікші!



    Менің алтындарым, сендер өз еңбектеріңмен және адал терлеріңмен осы үйдің кілтін қолдарыңа алып, оң аяқпен аттап отырсыңдар. Бұл үшін біз тек қана қуанамыз. Бүгін жаққан ошақтарыңның оты ешқашан сөнбесін. Екеу болып аттаған жаңа қоныстарың үбірлі-шүбірлі болған кезде, үлкен қара шаңыраққа айналсын! Біздей жас жұбайларға осындай пәтер жұғысты болсын.



    Үй салу, бала өсіру, ағаш отырғызу... Сен мұның бәрін де жасадың. Саған ғана емес, өзгеге де сая болар өз қолыңмен отырғызған ағашың бар, сенің ғана емес, өзгенің де баласы болар ұрпағыңды өрбітер тұяқтарың бар. Міне, енді өз жайлы мекенің де бар. Байдың сарайынан өзінің жыртық лашығын артық көрген Қожекеңде қадір бар ғой, шіркін! Ендеше, кеше ғана керегесі керіліп, шаңырағы көтерілген өз қонысыңа құтты болсын айтамыз!

    Қане, бәріміз төрт көзіміз түгел кезде, осы үйдің қожайынын сайлап алайық! Жоқ, кешіріңдер, бұл үйге отағасы, сен де, отанасы, сен де иелік ете алмайсың. Бұл үйдің қожайыны – бақыт болсын. Ендеше бәріміз іргесі жаңа қаланған ұяның кілтін бақытқа табыстайық! Қожайындарың сендерді ешқашан тастамайды деп сенеміз. Ол үшін сендер үй ішіндегі махаббат пен сүйіспеншілікке, достық пен сыйластыққа ие болып, жүректерің мен ниеттеріңді жиі тазалап, жамандыққа есік жауып, жақсылыққа есік ашып, көңілдеріңдегі шаң-тозаңды жиі қағып, өкініш пен өкпені жуып, кеудеден керексіз қасиеттерді қуып, кем-кетікті түгендеп, жаман қылықты жүгендеп, нәресте әлдилеп, бала тәрбиелеп отыруларың керек! Мұның бәріне қажырлы да қайратты мына отбасының шамасы келеріне сенемін. Қоныс құтты болсын!



    Бүгін сендердің жаңа үйлеріңде тек біз ғана қонақ болып отырмағанымызды біліңдер! Бүгін барша жақсылық атаулы да сендердің қоныстарыңа құтты болсын айтып келді. Біз әр тілек айтқан сайын олар орындарынан тұрып, бастарын иіп жатыр. Егер өздеріңнің қонақжайлылықтарыңды білдіріп, жылы шыраймен осы көрінбейтін қонақтарды жақсылап күтсеңдер, олар сендердің үйлеріңде мәңгілікке тұрақтамақ!



    Әр әйел өз айналасын жұмақтай етіп әрлендіре алатын Хауа-анадай болуы қажет. Ендеше біз де жас үй иесіне (әйел кісіге) жаңа шаңырағында жұмақ орнатуын тілейміз. Яғни үй толы жылылық пен жайлылық, достық пен махаббат болғанын қалаймыз. Әйел – үй ошағының қорғаушысы. Бұл – жауапсыз жұмыс емес.

    Алтындарым, жаңа үй сендерге жаңа өмір сыйласын. Егер ескі өмірге өкініштерің болмаса, сол өмірлерің жақсы жағынан жаңғыра берсін. Бәрі жаңарсын! Сендердің жаңа үйге аяқ басқан жаңалықтарың бізді де қуантты. Сендерді өз жайларыңда көргенімізге қуаныштымын.



    Жаңа қоныстан қуаныш арылмасын. Осы үйдің табалдырығын жақсылықта ғана аттайық. Осы үйдің дастарханы қуанышқа ғана жайылсын! Қоныс құтты болсын!
  2. Той
    Той 03.12.2020 04:52
    2 + 2 -
    Керемет үйге жаңа үйге тілектерің