Қазақтың ұлттық ойындары. Қазақ тілі, 6 сынып, дидактикалық материал. 6 сабақ

Таратылым материалы

- Самат, сен тоғызқұмалақ ойнай аласың ба?

- Былтыр жазда санаторийде демалғанмын, сол кезде үйренуге тура келді, өйткені қасымдағылардың барлығы күнде кешке жиналып тоғызқұмалақ ойнап жүрді.

- Жақсы ойнайсың ба?

- Жоқ, онша жақсы емес. Қазір көп ойнамаймын. Оны неге сұрадың?

- Мен қазір сол ойынға әуестеніп жүрмін. Өте қызық әрі ой-өрісіңді дамытуға көмектеседі екен.

- Иә, ата-бабамыздан қалған мұралардың бірі ғой. Мен сол санаторийде ойнап үйреніп жүрдім, кейін үнемі ойнауға уақыт болмай кетті. Мен кейбір ережелерін ұмытып қалыппын. Сен әуестеніп жүрсең, екеуміз ойнап тұрайық. Бұл ойын маған да ұнайды.

- Жақсы болды ғой, мен қазір шебер ойнай алмаймын, дегенмен бірнеше жарыстарға қатысып үлгердім.

- Ой, Бағдат, жарайсың. Тоғызқұмалақ – зияткерлік ойын. Қазір ол туралы бүкіл дүниежүзі біледі.

- Иә, ол 2006 жылдан бастап әлемге кең таныла бастады. Әлемдік зияткерлік ойындар бағдарламасына енгізілді. Лондонда өткен зияткерлік ойындар олимпиадасында 36 спорттық ойындар ішінен шетелдіктер тоғызқұмалаққа ерекше қызығушылық танытыпты. Қазір әлемде тоғызқұмалақпен шұғылданатындардың саны жүз мыңнан асып кетіпті.

- Олай болса, екеуміз де солардың қатарына қосылайық.

- Жарайды, уақыт болса хабарлас, тоғызқұмалақ ойнаймыз.