👈 қаріп өлшемі 👉

  Өлеңдер ✍️

  17.09.2022
  47


Автор: Танакөз Толқынқызы

Саяжайды саялар тоңған елес

Саяжайды саялар тоңған елес
Бұл көшенің аты жоқ. Болған емес.
Қала мені қаңғытып тауға кеттім,
Қорасы да бұйырмай қорған емес.
Арман болды дүние арман емес,
Бұл жотаны кезіп жүр жалған елес,
Өмір өтіп барады толған егес,
Мекен-жайым жоқ менің. Болған емес.
Қайран тағдыр қаңғуға жаратылған,
Қалбалақтап барады қара сұлбам.
Тар көшеде тайғанап жүргендерді
Тастадың ба шығарып санатыңнан?
Жылы қабақ танытар көше кімге?
Мына сайдан Кеңсайға көшемін бе?
Күн кеудемді көтеріп тауға шығам
Жоқ болған соң төменнің есебінде.
Маған қолын бұлғайды арай ғана,
Мені тастап кетсең кет, қарайлама.
Зор қалаға сыймаған көкірекпен
Тар молада жатамын қалай ғана?
Биікте де өмірім оңған емес,
Бақ орнына басыма қонған елес.
Ажалдың да жоқпыз біз есебінде
Бізде мола болмайды. Болған емес.


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы