Өлеңдер ✍️

  16.09.2022
  90


Автор: Жәнібек ӘЛИМАН

МУЗА

Сиқыры бөлек сырға бөгелдім,
Ұйқыны бөгеп, мұңға неге ендім?
Еліктей ерке, есімді алатын
Жаршысы ма едің жұмбақ әлемнің?
Құралай көзге құнықтым қалай,
Тұңғиық барын шын ұқтырды оңай.
Кішкентай, нәзік, жинақы бойға
Сұлулық біткен сиып тұр қалай?
Назыңнан қалқа бүлініп бетер,
Лебізден сұлу сыр ұғып шекер.
Небір ер маңғаз жаныңа барса
Жігері білем, үгіліп кетер.
Күлкісі сиқыр, гүл өңі көктем,
Риясыз еді іреңі неткен?!
Жүрегі құрығыр ынтыға берді
Ынтық та болмай жүр еді көптен.
Раушандай алау еріні дерсің,
Сәбидің даусы дем-үні дерсің.
Қайдан жүр жерде періште, бәлкім
Перизаттардың керімі дерсің.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу