Өлеңдер ✍️

Сауданың тілін кім білген,
Қымбаттап жатса бір-бірден.
Қарайсың тесік қалтаңа,
Қол қысқа алға жылжумен.
Өсірсе мұнша бағасын,
Жоғыңды қайдан табасың.
Күрмеуге келмей қысқа жіп,
Таңданып сонда қаласың.
Құралған сауда тиыннан,
Ырысың болар бұйырған.
Еңбекпен келер ырыздық,
Оңайдан емес қиыннан.
Қолынан беріп сақалды,
Саудагер біреу атанды.
Осындай жылпос ойымен,
Гүлдентем дей ме Отанды?
Болса да мөлдір аспаны,
Кигізді нарық ноқтаны.
Жасырар қазір жан бар ма,
Саудаға көшті жас, кәрі.