Өлеңдер ✍️

Құйылып керней дауысы,
Сыңғырлап бір үн естілді.
Тыныштық-тылсым тау іші,
Шілденің күні кешкірді.
Жақұттай болып жалтырап,
Толқиды көлде байыппен.
Қамыстар суда қалтырап,
Жүзбейді ешкім қайықпен.
Сұлудың мойыл көзіндей,
Мөлдіреп жатыр көл беті.
Жігітті сүйген кезімдей,
Ғажайып бүгін жер беті.
Көгілдір аспан ғарыштан,
Құйылып төмен тізіліп.
Асығып жеткен алыстан
Аққулар қонды сызылып.
Бақытты əуен сыңғырлап,
Бөленді əнге айнала.
Жұлдыздар тұрды жымыңдап,
Серуенге шықты Ай ғана.