Өлеңдер ✍️

Жартылай шыңнан қарады Ай,
Жалбыр тау мүлгіп қалыпты.
Салады еске қарағай,
Саптағы солдат – алыпты.
Жапырақтарды желпиді,
Самал жел тербеп тау ішін.
Еріксіз көңілім елтиді,
Естіп бұлбұл дауысын.
Сұңғыла көңіл киялдап,
Өткен бір сырды ақтарды.
Тауларға тарттым қияндап,
Аралап кеттім бақтарды.
Шегедей меруерт жалтырап,
Жұлдыздар көкте шарлайды.
Жапырақтар кеткен қалтырап,
Нөсерді жаны аңсайды.
Сырласам түнмен оңаша,
Шарладым бағын Қырымның.
Теңіздің түні тамаша,
Бастауы болды жырымның.