Өлеңдер ✍️

Аппақ айдың бетiн бұлт
Айғыздады сүртем деп.
Көктей солған Жетiмдiк
Көшеде жүр бүрсеңдеп.
Жанарына жас тұна
Жәутеңдейдi, қарашы?
Қара жердiң астына
Түсiп кеткен анасы...
Бұл өмiрде мән жоғын
Бiлмейтiнi – қатесi.
Iбiлiстiң зәмзәмiн
Iшiп кеткен әкесi...
Көкжиекке көше ме
Көкте шебiн құрған бұлт?
Маңырап жүр көшеде
«Ақсақ тоқты – құрмалдық».
Көгерер ме көсеге
Көкiрекке қона сап?
...Қаңғырып жүр көшеде
Қарасирақ – Болашақ...