Өлеңдер ✍️

Айналайын балапан құлындарым,
Сендер үшін ғұмырдың гүлін, нəрін
Теріп өскен ұрпақсыз ұға алғанға,
Аналықпен айтамын мұның бəрін.
Сол үшін айта жүрер тілегім де
Өсиет боп қалса елдің жүрегінде:
Біз көрмеген бақыттың бəрін көріп,
Алапаттың көрмеңдер біреуін де.
Аш та болдық, жетім де жесір болдық,
Дейтұғындай өмірге не үшін келдік.
Адам түгіл, ұмытқан Құдайын да
Тыныш күнде кесапат-кесір көрдік.
Тəуба, тəуба! Ел болдық егеменді,
Биігіне көтерер елеп ерді.
Бүгінгі ұрпақ күн кешпей бұқпантайлап,
Ертеңіне сиынып, сенеді енді.
Бар болыңдар бақытым – балаларым,
Түсірмеңдер төменге Адам арын.
Береке-бірлік деген ел бақыты
Тілейтіні сендерге Аналарың.