Өлеңдер ✍️

Періштеден естігендей бір ізгі үн,
Оңашада жүрегімнен жыр үздім.
Айналған соң әуеніме әдемі,
Сені аңсайды сезім дейтін сыбызғым.
Көздерімнен күліп атты құт таңы,
Сыңар болдық жазылмайтын жұптары.
Мені ерекше бір сезімге бөлейді,
Ерініңде қалып қойған сүт дәмі.
Саған үміт ұя салды сүйсініп,
Ақтығыңды әуел бастан түйсініп.
Дидарынан ән төгілген перизат,
Келбетіңе қалыпты әсем күй сіңіп.
Көңіл едім өзіңді ойлап күрсінген,
Өмір едім тамырласқан тылсыммен.
Самал өпкен бетіңнен бір сүйейін,
Шаштарыңнан иіскейін күн сіңген.
Сенші қалқам мендегі бұл сезімге,
Басыма кеп қонған бағым кезінде.
Көкірегіңе тамып түсіп өлең боп,
Өмір бойы мөлдірейін көзіңде.