Өлеңдер ✍️

  10.08.2022
  288


Автор: Ғалым Әріп

Әйелдер әлеміндегі әңгіме

Күн сенбі, дала бұлтты, күз әдемі,
Келгенмін қой базарға түс әлеті.
Мал таңдап, сойдыруға кезек күттім,
Той, қонақ – бұл қазақтың бір әдеті.
Жел үрлеп, тығыламыз ықтасынға,
Жасамыс жандар кілең тұр қасымда.
Бір әйел өткен күнді еске алады,
Уақыттың қалып қойған жылғасында:
-Балауса бір уыстай денем болды,
Ақырған аюдайын енем болды.
Төрт қызы төрт жағымнан анталаса,
Бетерден деген осы бетер болды!
Тұрмыстың тауқыметін арқаладық,
Тірелді намысымыз арға барып.
Тік тұрып тілерсектен қонақ күтіп
Жүргенде арайлайтын таң да ағарып.
Талмастан жұмысты да атқарамыз,
Қуанып, елмен бірге шаттанамыз...
Ауырдың үстіменен жүруге әуес
Қазіргі келіндерге таң қаламыз...
Бір апа сөз арнасын бұрғандай ма,
Адам көп, асығып бір тұрғандай ма?
-Қалада қой союға тиым сапты,
Қазан да астыруды тыйғандай ма?
Апырай, малды мейлі сойдырмасын,
Атағын жайсыз іспен жайдырмасын.
Қазаққа, Адайға тән ағаш үй мен
Қазанды тұғырынан тайдырмасын...
Бұл сөзді іліп кетті бір келіншек,
-Хакімің жан емес қой бір келімсек.
Еділің еңіреген ер емес пе ед,
Билікпен жайы бар ма тым келіспек?
Ақтаудан АЭС салмақ деседі жұрт,
Демеймін бостан-босқа бөседі жұрт...
Бір кезде салдырмаймын деген Еділ,
Бұл күнде самал желдей еседі кілт...
Өзеннен келіп едік көшіп енді,
Ақтауды мадақтаймыз несіне енді?
Астана, Алматыға қашамыз ба,
АЭС-тың дабыры үстем естіледі...
Тағы да тақырып дүр өзгереді,
Қозғады аққұба әйел сөз келелі:
-Ғарыштан құлдилаған метеорит
Құлайтын қара жерге кез келеді...
деп газет, ғаламторлар үркітуде,
Ғалымдар жауап таппай іркілуде...
Ақырзаман ауылы алыс емес,
Желтоқсанда дүние сілкінуде!..
Бір ару орамалды бөлді сөзді,
Тарқатып саясатты өргізеді.
-Қатерлі шаққа келді Таяу Шығыс,
Тарих тірі болсақ көргізеді.
Дейді ғой аңдамаған от басады,
Тосқын бар кім егерде көп тасады.
Иран мен Сирияға - Орыс, Қытай,
Түркияға – НАТО жақтасады!
Мұсылман мұсылманға оқ атуда,
Оқ атуда, жаңбырша боратуда!
Айдап салып алыста АҚШ отыр,
Адамзаттың күйместен ар отында!
Дүниенің дөңгелеп қас-қабағы,
Жер-Ана жанарынан жас тамады...
Дейді ғой сәуегейлер көп ұзамай
Үшінші жаһандық соғыс басталады!..
Танытып өзімізше ер, жігіт қылық.
Ертеңнен жүруші едік үміт қылып,
Әйелдер әлемінің әңгімесі
Байқасаң, тұнып тұрған біліктілік.
Жанымды кеткен ойды үгіттіріп,
Ішімде қайтем енді бүгіп тұрып?
Әйелдер адамзатқа алаңдайды,
Ғаламның бар болмысын ұғып, біліп.
Әйелдер көп хабарды аян етті,
Әйелдер көп сырларды баян етті.
Әйелдердің аңсары – бейбітшілік,
Әйелдер жек көреді қияметті.
Әйелдер ізігіліктен шырағым бұл,
Әйелдер мөлдірліктен бұлағым бұл.
Ей, Адамзат, ес жиып, тәубеңе кел,
Әйелдер әлеміне құлағың түрІ




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу