Өлеңдер ✍️

  10.08.2022
  89


Автор: Ғалым Әріп

Жанар ма, жанбас, бәлкім, бір күн бағым...

Жанар ма, жанбас, бәлкім, бір күн бағым,
Жанымның жаяиын бал сыр-жұмбағын.
Жылты бар жанарының, жарандарым,
Жаныма келіп кәусар жыр тыңдағын.
Адамдар, ашылайық ақтарылып,
Болмасын алтын таңдай шақтар ұмыт.
Бәріміз ғасырласпыз, замандаспыз,
Жүрелік замананы мақтан қылып.
Көңілдің ақ маржанын алға жайып,
Ғұмырды кешсек деймін бір ғажайып.
Адамдар адам қалпы өмір сүрсе,
Дүниең тартпақ емес алмағайып.
Па, шіркін, өмір қандай, өлең қандай,
Барша жан бақыт үшін жаралғандай.
Адамдар көзіндегі Күн-жылудан –
Тіршілік ұйып жаны нәр алғандай.
Жарандар, тыңда жырым құлақ қойып,
Тоқмейіл топас күйден жырақтайық.
Жаратқан өзімізді адам етіп,
Үмітін Жер-Ананың біз ақтайық.
Қашанда қарсы келмей табиғатпен,
Жанымыз жарасып бір жәмиғатпен,
Жүзіміз жарқыл қағып жүрелік те,
Өмірге қарап ұлы махаббатпен!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу