Өлеңдер ✍️

Өзі білген осы ауылдың тіршілігін , тынысын,
Күнделікті жұмысым деп есептейді мұнысын.
Балтыр сыздап, сырқыраса тізе де
Барып жатыр елеместен түн ішін...
Кейде өзі мазаланып әбігерге түседі,
Тамағын да мезгілсіз кеш ішеді,
Салқын тисін, тұмау, сүзек бәрінде
Емін айтар түйілсе де ішегің!
Ұйқы бермей сырқырасын тістерің,
Ас тұрмай судай кетсін іштерің,
Білмеймін деп айта алмайды бірінде
Шешіледі емді қалай істерің!
«Анализ» деп түспегенбіз сергелдең,
Сергитінбіз дидарын бір көргеннен,
Ұшықтайды, ем-дом жасап жазады
Хабары жоқ. Алымхорлық теңгеңнен.
«Вызв» деген келіп жатыр жан-жақтан,
Қайда барсын имандылық аңдатқан,
Ыңыранса науқаспенен қосылып
Жаны жүдеп өзі бірге толғатқан.
Бәріне ортақ, айтатын тең жобасын,
Сағынасың әжелердің мейірімді бағасын.
Аймалайтын мейірбике, дәрігердей
Енді қазір қай ауылдан табасың?