Өлеңдер ✍️

Бұлтты көрсең аспанда,
Жауады деп жасқанба.
Əдейі қысас жасайды ол,
Мəз болып ызғар шашқанға.
Шашыңды жаппа жібекпен,
Бұрымды серпіп кейінге.
Жаныңды сəтке жүдеткен,
Жалбағай бұлтқа кейіме.
Жығылмай жатып, жүгінбе –
Жеткізе бермес бар арман.
Жарқырап тұрған күнің де,
Сағынту үшін жаралған.
Қамалап сырқат кетті – деп,
Қамыққан кейпің батты ғой.
Болып та жатыр көп тілек,
Сондықтан тірлік тəтті ғой.
Сабырға сабыр қос, қалқам,
Өмірің – майдан, мың егес.
Сақтасын сəттен тас-талқан,
Бер жағындағысы түк емес.