Өлеңдер ✍️

Әлемнің асыл жері,
Әйгілі ғасыр төрі;
Жоңғардың ала белі,
Қазақтың ала көлі
Бауырласқан Жетісу.
Жеті өзен алқасы бар,
Айдын көл Балқашы бар;
Ақын қыз Сара туған,
Ілиястай дана туған,
Аңыз, дастан Жетісу.
Ақынның қаламынан,
Ұшқан құс жанарынан;
Асылдың тілегінен,
Сұлудың жүрегінен
Үзілмеген Жетісу.
Оянбас әнсіз күнге,
Оранбас нәрсіз гүлге;
Нұр қонған келбетіне,
Жұпарын жер бетіне
Қыз үрлеген Жетісу.
Еркелеп ескен желің
Өлкеме төккен лебін;
Достыққа, махаббатқа
Ұлғайтқан үміт-сенім
Жан қанаты Жетісу.
Сұлуым, еркем менің,
Көкіректі көркемдедің;
Шіркін-ай, қайда барсам,
Қасыма ертер ме едім,
Жер жаннаты Жетісу.