Өлеңдер ✍️

  14.06.2022
  148


Автор: Кәкімбек Салықов

СЫРЫМБЕТТЕГІ ТЕБІРЕНІС

Жарқ етті, әне, Сырымбет,
Құлагер қуып жетердей,
Ақан сері күлімдеп,
Ақтоты үнсіз өтердей.
Аспаннан тамды ән үзім,
Қарағай, қайың балбырап.
Айтылмай жүрген арызым
Кеудеден шықты ән құрап.
Қоскөлде әнші аққу-қаз,
Секілді қиял-ертегі.
Қосылып бәрі айтып наз,
Сен жайлы сырын шертеді.
Тоғайда тоты мұңданып,
Тамылжып тәтті үн тамды.
Бетіңдей қызыл нұрланып,
Қызара бөртіп гүл жанды.
Көшкен бұлт селдеп өтердей,
Исінді тауға жиылып.
Төгіліп өлең көкейде,
Жаңбырша жаудым құйылып.
Шабытшыл жаны гүлдемей,
Әуреге мені салардай,
Сырымбет тұрды үндемей,
Қасымнан сені таба алмай.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу