Өлеңдер ✍️

Абайша «кәміл мұсылман» –
Қатарда еңбек адамы.
Қарапайым ысылған,
Қара тер әрбір қадамы.
Мен де бір «кәміл мұсылман»,
Жезқазғанда кен қазған.
Ар жолында қысылман,
Сөз кені – өлең мен жазған.
Соғыс жылдар мал бағып,
Жұмыстың буын ұшырған.
Соқа айдаған зар қағып,
Құрдастарым мұсылман.
Майданда да, елде де
Жанкешті күшін ұсынған.
Малшынған қайғы-шерге де
Ата-анам менің мұсылман.
Көшпелі қауым көрді азап,
Отарлық шегіп қысылған.
Бодандық көштен ысырған,
Бүгінгі дербес бар қазақ –
Кіршіксіз «кәміл мұсылман».