Өлеңдер ✍️

(Игілік Омаровқа)
Игілік десе, өмірің
Елге игі болыпты.
Өсірер адам көңілін
Ізгілік саған қоныпты.
Әсем әуез шалқытып,
Сәкенше мөлдір толғаттың.
Ақанша баппен балқытып,
Ән ордасын орнаттың.
Ауылдан ұзап бармай-ақ,
Саяқ жүріп, дара оздың.
Жұлдыздардан қалмай-ақ,
Аспанда Айға қол создың.
Көркейткенде сананы,
Асылын алдың салмақтап.
Жүсіпбектей дананы
Ұстаз деп өттің ардақтап.
Қояр ма еркін сайратпай
Қолдаса ақыл сезімді.
Ұлы әнші Қайраттай
Ұстазым дейді өзіңді.
Ұмсынтып әнің гүл-дәрі,
Сұлулар қалды-ау аңсаған.
Жармасса да мың ару,
Көпсінбеп едім мен саған.
Кең жайласаң төскейді,
Туған ел қанат жалғады.
Ұлт құмар рухың өшпеді,
Сарыарқаның саңлағы.