Өлеңдер ✍️

Тамсантқан алтын арай таңыменен,
Сүйсінткен жан баураған сәніменен.
Көкшетау Жетісумен жалғасып тұр
Біржан сал, ақын Сара әніменен.
Балқаштың ғашық болып ақ түніне,
Алатау сәлем беріп ақ гүліне;
Оралған сексен көлден аққу-қаздар
Салады Үкілі Ыбырай «Гәккуіне».
Тойлы ауыл Сырымбеттің саласында,
Көз салса оза тартқан қарасынға,
Құлагер шауып жүрген секілденер
Көкше мен Жетісудың арасында.
Жаңғырса Ақан сері арман әні –
Есінен бар қазақтың қалмағаны.
Ақындық Құлагері Ілиястың
Тамаша ел мен елді жалғағаны.