Өлеңдер ✍️

3аңғар, заңғар Зайсанның тауларына,
жауды ма екен бұл жауын,
жаумады ма,
қызғалдағы қыр қуып қаулады ма,
қыза шығып самалдың саумалына?
Қыз біткенге қызғалдақ үлестіріп,
Жеменейдің жатқанда үні естіліп,
зеңгір-зеңгір Зайсанның шыңдарына
кетсем бе екен мен сені ілестіріп?
Кербез таудың керіліп ақ маралы,
көкейімде өзіңдей сақталады,
көп бояуға көзіңді тұндырар ең
айыра алмай жүргенде ақ-қараны.
Ұлар құстың ұясын көріп келіп,
бұлақтардың бұрымын өріп беріп,
тастан тасқа еркелеп секірер ең
елеңдеген елікке серік болып.
Жауған қарды көргенде тәңір шыңға,
пайғамбардай қарарсың самырсынға,
такаппарлық төнгенде тұс-тұсыңнан
өр мінезді мендегі танырсың да,
шатқалдағы мөп-мөлдір шар айнадан,
өз жүзіңді көргенде арайлаған,
бүлдіргенге боялған ерініңді
тосқаныңды білмессің қалай маған!