Өлеңдер ✍️

Алакөл жақты бетке алып,
Отырмын жалғыз шет қалып.
Көлімнің асау толқыны
Қуыршағымды кетті алып.
Қайырмасы:
Аңсатып мені қыз-ғұмыр,
Жалғасын тапты жыр-ғұмыр.
Таласып кейде қалады
Қыз-ғұмыр менен жыр-ғұмыр.
Зымырап ағып сағым күн,
Өмір заңына бағындым.
Бұрышта үй боп ойнайтын
Қуыршағымды сағындым.
Бұрымды шағым, бал шағым,
Тәтті еді қанша ай, қанша күн?
Білмеппін бірақ сол кезде
Өмірдің сонша алшағын.
Толқындар соғып жағаны,
Анам боп есік қағады.
Қыз-ғұмыр бесік тербетіп,
Алыстап кетіп барады.