Өлеңдер ✍️

Еркелеу етіп сені елің,
Домбыра жырға бөледі.
Ерітіп жанды әуенің,
«Сәби де болғың» келеді.
Қарқара жүрек сыр бермей,
Тәңірдің сыйы жүргендей.
Мұқағалидың мұңымен
«Аякөз ару» күлгендей.
Момақан, мөлдір тұлғаңдай
Сезімдер тұрар былғанбай.
Бала да, дана жүрегің
«Қазағым-ай» деп тұрғандай.
Сәбидей аңғал баласың,
Сырт көзге жәй бір ағасың.
Тұрсынғазы боп тарихқа,
«Ақбөкен» болып барасың.
«Қаламқас қыздар» көктемдей,
Шолпылар сыңғыр еткендей.
Өлең боп Мұқағалидан,
Ән болып саған жеткендей.
Әуенге толып көмейің,
Жарқырай берсін мерейің.
Мейірге мейір тіл қатып,
Толқынға толды Семейім!