Өлеңдер ✍️

Мен сені шыныменен жек көрем бе?!
Жек көрермін бес минут көп дегенде.
Оның өзі – амалым таусылғанда,
Оның өзі – шыдамым жетпегенде.
Құдай сүйер қылықжоқ кейде сенде,
Естіп жатам сыртыңнан, көрмесем де.
Тәрбиесіз дегенге дәтім бармас,
Аға сенде, аяулы женге сенде.
Жер шұқылап осылай қаламыз ба?!
Бір әзәзіл кірді ғой арамызға.
Сыбап алсам тиеді-ау әкемізге,
Сыбап алсам батады-ау анамызға!
Баласы бар баласың – ағаң үшін,
Адамдықтан аумасын адал ісің.
Көк сиямен мен жазған ақ шындықты,
Қып-қызыл ғып сызбасын қаламұшың...
Мен сені шынымменен жек көрем бе?!
Жек көрермін бес минут – көп дегенде.
Оның өзі – амалым таусылғанда,
Оның өзі – шыдамым жетпегенде!