Өлеңдер ✍️

Жұғымы жоқ жақынға, не жолдасқа,
Кісімсиді, келер жоқ қолдан басқа.
Инедей септігі жоқ армандасқа,
Ант еткен адам болып алданбасқа.
Қабағын сәл шытынып, түйіп кердең,
Бұлайды оқығанын жиып-терген.
Кісі емес өзге түгіл, өз жарын да,
Елжіреп, еміреніп сүйіп көрген.
Пір тұтып оқығанын пәлен томдап,
Жүреді оқта-текте өлең толғап.
Қарынға көңіл-күйі байланысты,
Келер толғақ немесе кетер толғақ.
Жүйрік ол бүгінгінің тіл-хатына,
Түскендей Онегиннің сипатына:
Кейде паң, кейде қорқақ, кейде батыр,
Адамсып ақылы сай тұрпатына.
Тұрса да ол айтқанды ішің біліп,
Ежіктеп, ерінбейді «түсіңдіріп»...
Өмірден алғаны көп, бергені жоқ,
Мезі етті мені осындай қысыр жігіт!